Vetëm 3 kilometër larg Tiranës/ Banorët e Sharrës denoncojnë pamjet skandaloze: Jetojmë si të harruar

Vetëm 3 kilometra larg Tiranës, banorët e Sharrës jetojnë çdo ditë mes pluhurit, baltës dhe rrugëve të shkatërruara në një realitet që s’ka asnjë lidhje me zhvillimin që reklamohet.

Sipas tyre, pjesa më e madhe e rrugës është e amortizuar dhe pothuajse e pakalueshme. Vetëm rreth 500 metra janë të shtruara, ndërsa pjesa tjetër mbetet në kushte të mjerueshme, duke u kthyer në problem serioz për qarkullimin dhe jetën e përditshme.

“Prej vitesh nuk është vënë dorë. Sa herë bie shi, rruga bëhet baltë dhe e rrezikshme. Jemi të detyruar ta përdorim çdo ditë,” shprehen banorët.

Ata kërkojnë ndërhyrje urgjente nga institucionet përgjegjëse, duke theksuar se është e papranueshme që në një distancë kaq të afërt me Tiranën, infrastruktura të jetë në këtë gjendje.

Pavarësisht kërkesave të vazhdueshme, deri tani nuk ka pasur asnjë zgjidhje konkrete, ndërsa banorët ndihen të lënë pas dore dhe pa zë./Piranjat news