Të shtënat me armë nga jahti në Palasë, momenti kur katër biznesmenët që ndodheshin në bord zbresin nga mjeti lundrues

Janë publikuar pamjet nga momenti kur personat që ndodheshin në jahtin ku u qëllua me armë zjarri në zonën e palasës zbresin nga mjeti lundrues. Siç shihet edhe në pamje, njëri prej tyre është i lagur dhe po fshihet me peshqir, pasi ishte hedhur në det për t'i shpëtuar policisë, ndërsa dy të tjerët kanë tentuar të largohen me gomone. Personi që ishte hedhur në det është kapur nga policia, ndërkohë dy të tjerët me gomone, pasi kanë parë praninë e efektivëve në tokë, janë kthyer sërish drejt jahtit.

Më pas autoritetet kanë ndaluar mjetin lundrues dhe kanë shoqëruar katër personat që ishin në bord. Mes personave të shoqëruar është Astrit Gjonpalaj, ish-punonjës policie dhe pronar i kompanisë "Globus Travel", si edhe Astrit Meta, shtetas shqiptaro-amerikan.

Jahti fillimisht kishte marrë drejtimin për në Greqi, por më pas ndryshoi kurs. Në përpjekje për t'i ikur autoriteteve, jahti ka fikur dritat dhe ka vijuar lëvizjen në det, por pas dy orësh ndjekjeje, mjeti u ndalua dhe u dërgua në Portopalermo për kontroll të imtësishëm.

Mjeti lundrues iu nënshtrua një kontrolli të imtësishëm nga forca të shumta policie, por ende nuk është bërë e ditur se çfarë është gjetur në bord. Megjithatë ende nuk dihen motivet e të shtënave dhe as kush ka qëlluar me armë, ndërsa hetimet vijojnë për të dokumentuar rrethanat e plota të ngjarjes.