Pak javë më parë ju treguam skemën që ka nisur të aplikohet në masë nga ekzekutivi për të anashkaluar transpar...
AKTUALITET
Thatësira 'zbraz' Fierzën, niveli i ujit bie me mbi 18 metra
PiranjatPërditësimi i fundit 23 August 2026, 10:36
Niveli i ujit në liqenin e Fierzës, ujëmbledhësi më i madh i kaskadës së Drinit, ka shënuar rënie si pasojë e thatësirës së zgjatur dhe temperaturave të larta.
Sipas të dhënave të datës 22 gusht 2026, niveli i liqenit ka zbritur në kuotën 277.47 metra mbi nivelin e detit. Në raport me kuotën maksimale prej 296 metrash, rënia është 18.53 metra.
Megjithatë, niveli aktual mbetet rreth 6.47 metra mbi kuotën optimale, e cila llogaritet në rreth 271 metra. Pika kritike për funksionimin e hidrocentralit është rreth kuotës 240 metra, nivel në të cilin turbinat nuk mund të vijojnë prodhimin e energjisë.
Në Hidrocentralin e Fierzës, aktualisht po prodhohen rreth 190 megavat energji, ndërsa në punë janë dy agregate.
Rënia e nivelit të ujit është e dukshme edhe në terren, ku tërheqja e ujërave ka nxjerrë në pah këmbët e dy urave, Drini i Zi dhe Drini i Bardhë. Në nivele më të larta të liqenit, këto struktura qëndrojnë pjesërisht të mbuluara nga uji.
Situata e rezervave ujore në Fierzë mbetet e lidhur me prurjet në kaskadën e Drinit dhe kushtet atmosferike, ndërsa vijimi i thatësirës mund të ndikojë në nivelin e ujit dhe prodhimin hidroenergjetik.
