Tragjedi në Shkodër! Banesa shkrumbohet nga flakët, humb jetën nëna bashkë me dy fëmijët

Një shtëpi është shkrumbuar nga zjarri në fshatin, Domen të Postribës në Shkodër këtë të mërkurë. Mësohet se brenda saj ndodhej nëna së bashku me dy fëmijët.

Raportohet se nëna dhe fëmijët e saj, kishin shkuar tek banesa e vjetër, e cila ishte e pabanueshme. Pas disa çastesh, shtëpia është përfshirë nga flakët dhe është shkrumbuar.

Edhe pse zjarrëfikëset mbërritën në vendngjarje me vështirësi për shkak të terrenit malor, banesa ishte shkrumbuar totalisht. 

Njoftimi i policisë

Shkodër/Informacion paraprak

Rreth orës 13:10, në fshatin Domen, Shkodër, ka rënë zjarr dhe është djegur banesa në pronësi të shtetasit B. Ç.

Shërbimet e Policisë dhe punonjësit e shërbimit zjarrfikës, pas marrjes së njoftimit, kanë shkuar në vendngjarje.

Nga veprimet e para dyshohet se, si pasojë e zjarrit, kanë humbur jetën shtetasja B. Ç., 24 vjeçe, dhe dy fëmijë të mitur, përkatësisht 3 vjeç dhe 1 vjeç e gjysmë.

Grupi hetimor, nën drejtimin e Prokurorisë, po punon për përcaktimin e shkakut të rënies së zjarrit dhe dokumentimin e plotë të rrethanave të ngjarjes.