Një aksident rrugor është regjistruar mëngjesin e sotëm në Kukës, në vendin e quajtur “Lugina e Drinit të Zi&...
AKTUALITET
U arratis nga Burgu i Reçit/ Reagon Drejtoria e Burgjeve: Petrit Ndoci nuk u kthye nga leja shpërblyese, kanë nisur veprimet për lokalizimin e tij
PiranjatPërditësimi i fundit 21 August 2026, 15:19
Drejtoria e Përgjithshme e Burgjeve ka reaguar zyrtarisht pas një incidentit të regjistruar në IEVP Reç, Shkodër, ku një i dënuar i sigurisë së zakonshme nuk është rikthyer në qeli pas përfundimit të lejes shpërblyese.
Sipas njoftimit zyrtar, Petrit Ndoci kishte përfituar leje nga data 14 gusht 2026 dhe duhej të paraqitej pranë institucionit ditën e sotme, më 21 gusht, në orën 12:30. Pasi është konstatuar mungesa e tij në orarin e përcaktuar, strukturat e informacionit të IEVP Reç kanë nisur menjëherë verifikimet.
Nga kontaktet e kryera me familjarët e të dënuarit në fshatin Rukaj, Njësia Administrative Luf, Qarku Shkodër, është mësuar se ai ishte larguar nga banesa që gjatë orëve të mëngjesit të sotëm.
Lidhur me ngjarjen janë vënë menjëherë në dijeni strukturat e Policisë së Shtetit dhe Drejtoria Vendore e Policisë Shkodër, të cilat kanë nisur punën dhe po kryejnë veprimet e nevojshme operative për lokalizimin dhe kapjen e tij. Drejtoria e Përgjithshme e Burgjeve bën me dije se po e ndjek me prioritet të lartë rastin.
Njoftimi i Drejtorisë së Përgjithshme të Burgjeve:
"Njoftim për një të dënuar që nuk është kthyer nga leja shpërblyese. Në IEVP Reç, Shkodër, i dënuari P.N., i sigurisë së zakonshme, i cili ndodhej me leje shpërblyese në fshatin Rukaj, Njësia Administrative Luf, Qarku Shkodër, nuk është paraqitur për t’u rikthyer në institucion në përfundim të afatit të lejes. I dënuari P. N. kishte përfituar leje shpërblyese nga data 14.08.2026, ora 12:30, deri më 21.08.2026, ora 12:30.
Pas konstatimit të moskthimit në kohë, strukturat e informacionit të IEVP Reç, Shkodër, kanë kryer verifikimet përkatëse. Nga kontakti me familjarët është marrë informacioni se i dënuari ishte larguar nga banesa gjatë orëve të mëngjesit.Për rastin janë njoftuar menjëherë strukturat përkatëse të Policisë së Shtetit, Drejtoria Vendore e Policisë Shkodër, ndërsa vijojnë veprimet për lokalizimin dhe kapjen e tij. Drejtoria e Përgjithshme e Burgjeve, në bashkëpunim me Agjencinë e Mbikëqyrjes në Sistemin e Ekzekutimit të Vendimeve Penale dhe Policinë e Shtetit, po e ndjek me prioritet rastin dhe do të informojë publikun për zhvillimet e mëtejshme.", shkruan Drejtoria e Përgjithshme e Burgjeve.
