U denoncua nga PIRANJAT/ Zhvillohet sot seanca për kryebashkiaken e Tropojës, Zyra Islamaj

U denoncua nga emisioni investigativ Piranjat, duke ngritur dyshime të forta për abuzim me detyrën në Bashkinë e Tropojës, sot pritet të zhvillohet seanca gjyqësore ndaj kryebashkiakes në detyrë, Zyra Islamaj, e cila përballet me akuza për korrupsion pasiv.

Zyra Islamaj, e cila ushtronte kompetencat e kryetares pas arrestimit të Rexhë Byberit, pas denoncimit të rastit nga emisioni Piranjat, akuzohet nga Prokuroria e Posaçme për veprën penale “korrupsion pasiv”.

Kryetarja në detyrë e Bashkisë përmes një tenderi të hapur, ka ndërhyrë tek ndërtuesi Rrok Gega, në mënyrë që ky i fundit të ndërtonte një urë mbi përroin që kalon pranë shtëpisë së motrës së saj. SPAK thotë se Islamaj planifikoi të angazhonte edhe teknikun e mirëmbajtjes së rrugëve, punonjës në Bashkinë Tropojë, për ta ndihmuar ndërtuesin. Edhe ndërtuesi, nga ana e tij, ka pohuar se ky ndërtim nuk ka qenë në procedurat e tenderimit dhe ai do t’ia bënte dhuratë Kryetares së Bashkisë Tropojë.