Një anije cisternë nafte ka shpërthyer në Ngushticën e Hormuzit pasi dyshohet se është përplasur me një minë...
AKTUALITET
U helmuan 56 studentë të Akademisë së Policisë, këto janë pamjet brenda kuzhinës ku ushqimi ishte i kontaminuar
PiranjatPërditësimi i fundit 7 Maj 2026, 17:12
56 studentë të Akademisë së Sigurisë përfunduan në spital pas një dyshimi për helmim ushqimor, ndërsa policia ka arrestuar kuzhinierin dhe një teknologe ushqimi të kompanisë së kateringut që furnizonte institucionin.
Sipas njoftimit të Policisë së Tiranës, studentët u dërguan një ditë më parë (6 maj) për ndihmë mjekësore në Repartin Infektiv të QSUT-së, pasi dyshohet se u helmuan nga ushqimi i konsumuar në ambientet e Akademisë së Sigurisë.
Autoritetet bëjnë me dije se të gjithë studentët kanë marrë ndihmën e nevojshme mjekësore dhe janë larguar nga spitali në gjendje të mirë shëndetësore.
Policia ka shpallur në kërkim administratoren e kompanisë së kateringut, shtetasen A. T., 52 vjeçe.
“Dje, janë dërguar për ndihmë mjekësore në Repartin Infektiv të QSUT-së, 56 studentë të Akademisë së Sigurisë, të cilët dyshohet se janë helmuar pas konsumimit të ushqimit në ambientet e Akademisë së Sigurisë.
Të gjithë studentët morën ndihmën e nevojshme mjekësore dhe kanë dalë nga spitali, në gjendje të mirë shëndetësore.
Specialistët për Hetimin e Krimeve të Komisariatit të Policisë Nr. 1, në vijim të veprimeve hetimore të kryera në drejtimin e Prokurorisë së Tiranës, për këtë rast:
-arrestuan në flagrancë shtetasit K. B., 52 vjeç dhe K. P., 23 vjeçe, me detyra respektive kuzhinier dhe teknologe ushqimi në kompaninë e kontraktuar për të ofruar ushqim në Akademinë e Sigurisë;
-referuan materialet në Prokurori ku nisi procedimi në gjendje të lirë për shtetasen R. Ç., 35 vjeçe, me detyrë teknologe ushqimi në këtë kompani;
-shpallën në kërkim administratoren e kompanisë, shtetasen A. T., 52 vjeçe.
Punohet për kapjen e shtetases A. T., individualizimin dhe dokumentimin e përgjegjësisë penale të shtetasve të përfshirë në këtë rast.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprën penale “Importimi, prodhimi, shitja dhe ruajtja e ushqimeve të rrezikshme për shëndetin ose jetën e njerëzve””, thuhet në njoftim.
