16-vjeçari Arjon Xhezairi ka ndërruar jetë në Spitalin e Traumës në Tiranë, pasi nuk arriti t’u mbijetonte plagë...
AKTUALITET
U kap duke transportuar kokainë, arrestohet violinisti shqiptar në Francë
PiranjatPërditësimi i fundit 15 August 2026, 10:31
Një violinist 45-vjeçar me origjinë shqiptare është arrestuar në Francë, pasi u kap duke transportuar 38.3 kilogramë kokainë të fshehur në automjetin e tij.
Sipas mediave të huaja, shtetasi, B. B., violinist profesionist dhe anëtar i orkestrës simfonike Victor-Hugo Bourgogne Franche-Comté, u ndalua nga doganierët në pikën e pagesës së La Turbie, teksa udhëtonte drejt Italisë me një automjet Citroën C5 Aircross.
Gjatë kontrollit, doganierët konstatuan një hapësirë të dyshimtë nën tapetin e sediljes së pasagjerit. Më pas zbuluan dy hapësira të modifikuara në dyshemenë e automjetit, ku ishte fshehur kokaina.
Në Gjykatën Penale të Nisës, 45-vjeçari pranoi se kishte marrë përsipër transportin e drogës kundrejt pagesës prej 20 mijë eurosh. Ai tha se ishte përfshirë në këtë aktivitet përmes disa njohjeve të krijuara gjatë një udhëtimi në Shqipëri, ndërsa mohoi të ishte kërcënuar.
Sipas autoriteteve franceze, droga e sekuestruar do të kishte një vlerë prej rreth 1.14 milionë eurosh nëse shitej me pakicë.
Kontrollet nuk u ndalën vetëm te automjeti. Gjatë kontrollit të banesës së violinistit, autoritetet gjetën katër armë zjarri, dy pushkë, një jelek antiplumb, qindra fishekë dhe 88.900 euro cash.
Për armët, 45-vjeçari deklaroi se ishte i regjistruar si qitës sportiv, ndërsa për shumën e parave pretendoi se ishte një dhurim nga babai i tij.
Prokuroria ngriti dyshime mbi deklaratat e tij, duke vënë në dukje sasinë e madhe të kokainës, mënyrën e sofistikuar të fshehjes së saj dhe arsenalin e gjetur në banesë.
Në fund, gjykata vendosi ta lërë në paraburgim. Violinisti do të përballet me gjyqin në muajin tetor dhe për veprën penale për të cilën akuzohet rrezikon deri në 10 vite burg.
