16-vjeçari Arjon Xhezairi ka ndërruar jetë në Spitalin e Traumës në Tiranë, pasi nuk arriti t’u mbijetonte plagë...
AKTUALITET
U martua me të burgosurin dy javë para ekzekutimit, flet 31-vjeçarja shqiptare: Nuk do të rresht së luftuari për të!
PiranjatPërditësimi i fundit 5 September 2026, 20:14
Kur Tiana Krasniqi i dërgoi një email një të burgosuri në qelinë e vdekjes në Teksas, në vitin 2024, dashuria ishte gjëja e fundit që kishte në mendje. Ajo studionte të drejtën ndërkombëtare të të drejtave të njeriut kur kontaktoi të burgosurin James Broadnax, thjesht për qëllime kërkimore akademike mbi racizmin dhe dënimin me vdekje.
I dënuar për vrasjen e dy personave gjatë një grabitjeje të ndodhur 20 vjet më parë, çështja e tij ishte përfshirë prej kohësh në polemika. Por ajo që nisi si një komunikim formal, shumë shpejt u shndërrua në diçka më shumë.
Pavarësisht mijëra kilometrave dhe hekurave që i ndanin, Tiana e gjeti veten duke rënë në dashuri me të. Ajo u martua me të vetëm dy javë para ekzekutimit, të cilin u përpoq dëshpërimisht ta ndalonte.
Ajo u detyrua të shikonte bashkëshortin e saj të ri duke u ekzekutuar në prill të këtij viti. Tashmë në zi, 31-vjeçarja Tiana është e vendosur të provojë pafajësinë e tij. “Nuk e kisha menduar kurrë se do të dashurohesha me James, por nuk do të ndalem së luftuari për të pastruar emrin e tij”, thotë ajo.
Tiana studionte për një master në të drejtën ndërkombëtare të të drejtave të njeriut, kur kontaktoi një burg në Teksas, SHBA, me shpresën për të intervistuar 37-vjeçarin James, si pjesë e kërkimit të saj.
Njëzet vjet më parë, James dhe kushëriri i tij ishin dënuar për vrasjen e dy burrave gjatë një grabitjeje që kishte shkuar keq, por çështja e James ishte përfshirë në polemika. Rrëfimi i tij ishte marrë në një kohë kur ai ishte nën efektin e drogës, ndërsa prokuroria kishte kërkuar që të gjithë anëtarët me ngjyrë të jurisë, përveç njërit, të përjashtoheshin nga trupi gjykues.
Por, në një rrëfim tronditës pak para ekzekutimit, kushëriri i Broadnax, Demarius Cummings, mori përsipër të gjithë përgjegjësinë për vrasjet.
Yje të njohur të muzikës rap, përfshirë Travis Scott dhe Young Thug, mbështetën një apelim të fundit në Gjykatën e Lartë për të ndaluar ekzekutimin e tij.
Tiana tregon: “Po studioja ndikimin e racizmit në zbatimin e dënimit me vdekje dhe u gëzova kur James më tha se ishte i gatshëm të fliste me mua. Ai ishte inteligjent dhe i menduar mirë, ndaj nuk mund të mos më pëlqente.
Flisnim për çështjen e tij ligjore dhe ndanim me njëri-tjetrin histori nga fëmijëria dhe mënyra se si ishim rritur. Unë isha rritur në sistemin e kujdesit social në Britani, ndërsa James kishte përjetuar abuzim dhe neglizhencë. U afruam shumë shpejt dhe flisnim në telefon për orë të tëra çdo ditë.”
Gjatë muajve në vijim, Tiana u trondit kur kuptoi se po zhvillonte ndjenja për Jamesin – dhe ai ndihej njësoj.
“Katër muaj pasi kishim folur për herë të parë, ai më kërkoi të bëhesha e dashura e tij dhe unë rezervova një udhëtim për ta vizituar”, tregon ajo.
Vendimi i saj nënkuptoi kalimin e muajve larg vajzës së saj nëntëvjeçare, e cila qëndroi në Britani me të atin. “Miqtë e mi ishin të shqetësuar për mua, por e dinin se nuk mund të më ndryshonin mendjen”, thotë ajo.
“Të gjithë emocionet dhe nervozizmi u zhdukën sapo e pashë për herë të parë. Ai ishte shumë i pashëm. Na lejohej të qëndronim bashkë maksimumi katër orë në një takim, por ishte pothuajse sikur të ishim në një takim romantik. Madje ndamë edhe një vakt me sanduiçe me pulë dhe pica, secili në anën e tij të xhamit.” Ndërsa Tiana ndodhej në Teksas, ajo vazhdoi të hetonte çështjen e Jamesit.
“Po rishikoja dosjet gjyqësore kur hasa diçka tronditëse – lexova se ADN-ja e Jamesit nuk ishte gjetur te viktimat apo në armën e krimit.
Në vend të saj, ADN-ja e kushëririt të tij ishte gjetur si në armë, ashtu edhe në xhinset e njërit prej viktimave.”
Tiana u kthye në burg, ku James i tha se kishte pranuar fajin për të mbrojtur kushëririn e tij.
Duke kërkuar drejtësi, ajo foli me avokatët, por ata i shpjeguan se nuk kishte shumë gjëra që mund të bëheshin – kushëriri i tij nuk kishte pranuar fajësinë dhe James nuk e kishte tërhequr rrëfimin e tij.
“E dija se sistemi ishte kundër nesh, por u betova se do të vazhdoja të luftoja”, thotë Tiana. Por, në fillim të këtij viti, në shtëpinë e saj në Londër, Tiana mori një lajm shkatërrues.
“Avokati i Jamesit telefonoi për të më thënë se ishte caktuar data e ekzekutimit – kishin mbetur vetëm katër muaj. E vendosur për ta shpëtuar, gjatë muajve në vijim kalova çdo moment të lirë duke punuar për çështjen e tij. Nisa një peticion për t’i kërkuar autoriteteve shtyrjen e ekzekutimit dhe ai mori 88 mijë firma. Edhe kushëriri i Jamesit rrëfeu dhe nënshkroi një deklaratë ku pretendonte se ishte ai që kishte planifikuar dhe kryer të shtënat, jo James. Por çdo apel që James paraqiti në sistemin gjyqësor u rrëzua.”
Tiana dhe James vendosën të martoheshin dhe, vetëm dy javë para datës së ekzekutimit, Tiana udhëtoi drejt SHBA-së, citon Sun.
Ajo veshi një fustan të thjeshtë të bardhë dhe iu tha se James duhej të qëndronte pas xhamit për të shkëmbyer betimet e martesës – madje as nuk lejohej ta puthte.
“Sigurisht, nuk ishte aspak dita e martesës që kisha imagjinuar dhe asnjë nga familjarët apo miqtë e mi nuk ishte aty, por isha e vendosur që të ishte një ditë e bukur.
Të dy qamë ndërsa lexonim betimet tona.
I thashë: ‘Nuk është derisa vdekja të na ndajë, por derisa të takohemi përsëri’. Më pas, secili prej nesh puthi xhamin.” /PiranjatNews/
