Studentët në Universitetin e Korçës kanë vijuar bojkotin e mësimit, në mbështetje të protestës studentore e ...
AKTUALITET
U mor peng për 70 mijë euro, dalin pamjet e 29-vjeçarit nga Kosova duke drekuar me pengmarrësit në Vlorë (VIDEO)
PiranjatPërditësimi i fundit 13 December 2025, 15:33
Para se të merrej peng, 29-vjeçarit kosovar Fisnik Xhaka në Vlorë drekoi me të rinjtë nga Vlora, përkatësisht Vilson Agaj, Orest Çorapaj dhe Julian Zogaj. Ata janë arrestuar tanimë nga policia pas pengmarrjes për një shumë prej 70 mijë eurosh.
I riu nga Kosova dyshohet se kishte rol ndërmjetësues në një marrëveshje droge me persona jashtë Shqipërisë, çka më pas u kthye në shkakun kryesor të konfliktit.
Mësohet se Xhaka kishte dalë garant për tre të arrestuarit, duke siguruar që një sasi droge me vlerë rreth 70 mijë euro të dorëzohej në një vend të Bashkimit Evropian pa u paguar paraprakisht.
Marrëveshja parashikonte që pagesa të kryhej më vonë, por paratë për ngarkesën nuk u kthyen kurrë, duke sjellë konfliktin midis tyre. Për këtë arsye, Fisnik Xhaka u mbajt peng për rreth dy javë, gjatë të cilave dyshohet se është ushtruar dhunë fizike ndaj tij.
Ngjarja u zbulua pas denoncimit të motrës së 39-vjeçarit, e cila jeton në Suedi dhe njoftoi autoritetet përmes Interpolit. Ky i fundit koordinoi veprimet me Policinë e Vlorës, e cila arriti të lokalizojë vendndodhjen e Xhakës dhe të arrestojë tre autorët brenda vetëm 15 minutash.
Avokatët mbrojtës të të arrestuarve pretendojnë të kundërtën, duke paraqitur video dhe fotografi ku Xhaka shfaqet duke drekuar qetësisht me personat e ndaluar. Sipas palës mbrojtëse, këto pamje tregojnë se mes palëve ekzistonte një marrëdhënie miqësore.
Apartamenti ku mbahej peng i riu nga Kosova gjendet rreth 300 metra larg Komisariatit të Policisë Vlorë dhe ishte i pajisur me kamera sigurie që monitoronin lëvizjet.
Pas ndërhyrjes së policisë, Fisnik Xhaka u lirua dhe iu dha ndihma mjekësore për dëmtime të lehta.
Gjatë kontrolleve në banesa, policia sekuestroi një sasi lënde të dyshuar narkotike të llojit Cannabis Sativa në banesën e Julian Zogajt, si dhe një radio marrëse-dhënëse të ngjashme me ato që përdoren nga Policia.
