Një qytetar i është drejtuar redaksisë së Piranjat News për të denoncuar djegien e mbetjeve në landfillin e fshatit Ha...
AKTUALITET
Akuzohet për vrasjen e çiftit Mujeci/ Adriano Mhillaj në kërkim që nga janari, i riu kanosi me armë një 32-vjeçar
PiranjatPërditësimi i fundit 28 Prill 2026, 10:08
Adriano Mhillaj u shpall në kërkim për vrasjen e dyfishtë në Balldren, ku humbën jetën çifti Kreshnik dhe Gentjana Mujeci mesditën e së dielës, 26 prill, në Lezhë. Mësohet se 22-vjeçari kërkohej nga policia e Shkodrës që prej 16 janarit 2026 për “kanosje me armë” dhe “mbajtje pa leje të armëve”.
Ngjarja ndodhi te “Kryqëzimi i Vinotekës” në Shkodër, ku pas një konflikti, Mhillaj dyshohet se kanosi me armë Eduard Kësallën. Ky i fundit më pas qëlloi me armë dhe u shpall në kërkim për “vrasje në tentativë” dhe armëmbajtje pa leje.
Kësalla u arrestua tre javë më parë në zonën e Freskut, në Tiranë, gjatë operacionit “Operacionalja 89”. Ndërsa Adriano Mhillaj nuk është lokalizuar nga polica gjatë kësaj kohe.
Dyshohet se automjeti tip AudiA4 i cili u përdor në vrasjen e çiftit Mujeci në Balldre ka qenë i njëjti i përdorur në ngjarjen e 16 janarit 2026 në përplasjen me armë mes Adriano Mhillaj dhe Eduard Kësalla. Të dy si Kësalla si Mhillaj janë banorë të fshatit Grudë e Re të Shkodrës.
Atentati ndodhi rreth orës 14:50 të së dielës, 26 prill, ku si pasojë humbën jetën një çifti bashkëshortësh. Viktimat janë identifikuar si Kreshnik dhe Gentjana Mujeci, përkatësisht 39 dhe 32 vjeç. Çifti po udhëtonte me një automjet tip “Audi Q7”, kur është qëlluar me breshëri plumbash. Pas ngjarjes autorët janë larguar nga vendi i krimit pa lënë gjurmë.
Kreshnik Mujeci ka qenë më herët i arrestuar, në tetor të vitit 2017, si i dyshuar për vrasjen e shtetasit Genci Mhillaj në Shkodër. Në atë kohë, ai u akuzua për veprën penale “Vrasja me paramendim”, e kryer në bashkëpunim. Lidhur me atentatin, në kërkim janë shpallur Adriano Mhillaj 22 vjeç; Florin Mhillaj 36 vjeç dhe Renato Mhillaj 23 vjeç, të cilët sipas policisë, kanë mbajtur nën vëzhdim çiftin e bashkëshortëve dhe më pas kanë qëlluar me breshëri drejt tyre.
Renato Mhillaj është djali i Genc Mhillajt, i vrarë në vitin 2016, ndërsa dy të tjerët nipërit e tij. Për vrasjen e Mhillajt asokohe u akuzua Kreshnik Mujeci dhe kushëriri i tij Jozef Mujeci, por gjykata e Shkodrës i shpalli ata të pafajshëm dy vite më vonë.
Policia e Lezhës tha në një deklaratë për mediat se ngjarja ka ndodhur për gjakmarrje, ndërsa zbuloi edhe lëvizjet e autorëve. Sipas policisë, tre të akuzuarit kanë mbajtur nën vëzhgim lëvizjet e Kreshnik Mujecit me një automjet tip Audi A4. Më pas, me një automjet tjetër tip “Volksëagen” pa targa, dyshohet se i ka prerë rrugën automjetit me të cilin udhëtonte Kreshnik Mujeci së bashku me bashkëshorten e tij, dhe kanë qëlluar me breshëri drejt tyre.
