Tenderi 50 milionë euro për mirëmbajtjen e akseve rrugore kombëtare është është shndërruar në një skandal...
AKTUALITET
“U shpëtoi disa atentateve, edhe me dron…”/ Kush ishte “Leksi i druve” dhe armiqësia me ish-deputetin e PS
PiranjatPërditësimi i fundit 9 Prill 2026, 11:39
Është ekstraduar nga Italia drejt Shqipërisë shtetasi Aleks Ndreka, i arrestuar në Itali pasi ishte shpallur në kërkim në kuadër të operacionit “Metamorfoza”. Ndreka ishte vendosur më herët nën masën e sigurisë “arrest në burg” në mungesë, i dyshuar për përfshirje në grup të strukturuar kriminal dhe për sigurimin e kushteve dhe mjeteve për kryerjen e vrasjeve.
“Në vijim të koordinimit të veprimeve operacionale, me homologët italianë, nëpërmjet specialistëve të Interpol Tiranës dhe specialistëve të Interpol Romës, gjatë kësaj faze të operacionit ndërkombëtar të koduar “The Wanted”, u finalizua procedura për ekstradimin nga Italia, në Shqipëri, të shtetasit A. N. alias A. D., 49 vjeç.
49-vjeçari ishte në kërkim ndërkombëtar, sepse Gjykata e Posaçme e Shkallës së Parë për Korrupsionin dhe Krimin e Organizuar, në vitin 2023, i ka caktuar masën e sigurisë “Arrest në burg”, për veprën penale “Sigurimi i kushteve dhe i mjeteve materiale për të kryer vrasje”, kryer në kuadër të grupit të strukturuar kriminal.
Shtetasi A. N. alias A. D. akuzohet se pasi ka siguruar informacion mbi vendndodhjen e 3 shtetasve shqiptarë, ka organizuar dhe ka koordinuar bashkëpunëtorët e tij, duke organizuar prita, me qëllim vrasjen e tyre”, njofton policia.
Aleks Ndreka, (Deda) është personazh i njohur në botën e krimit, kryesisht në Lezhë dhe në Shkodër.
I njohur ndryshe dhe si ‘Leksi Druve’’, ndaj tij janë bërë disa atentate, më i frikshmi me dron.
Ai është një nga 15 personat e shpallur në kërkim nga SPAK-u në operacionin e koduar “Metamorfoza”.
Sipas dosjes së SPAK rezulton se ish-deputeti i PS, Arben Ndoka kërkonte vrasjen e Ndrekës për shkak se dyshonte që ai ishte personi që kishte ndihmuar në vrasjen e vëllait të tij, Aleksandër Ndoka.
Nga dosja u zbardhën komunikimet se si Behar Bajri, kishte kontraktuar Aleks Ndrekën dhe Prek Kodrën për të mbledhur informacion lidhur me vendodhjen e Dorian Dulit apo Genc Tafilaj.
Çdo të dhënë të mbledhur, Ndreka dhe Kodra ja çonin përmes “Sky” Behar Bajrit, ndërsa ky i fundit mobilizonte celulën e vrasësve, të cilën e mbante në gadishmëri së bashku me armët dhe makinën.
Teksa së deklaratën e tij Tafilaj ka treguar se: “…në varrimin e Indrit Rrajës, ka qenë edhe Aleks Ndreka i cili është afruar dhe më ka takuar së bashku me Dorian Dulin…”. Ndërkohë po nga e njëjta dosje hetimore janë arritur të dokumentohen fakte se Aleks Ndrekën kanë tentuar ta vrasin madje edhe me metoda të sofistikuara si me dron, por dështuan.
Kjo pasi kishte dyshime se Ardian Nikulaj dhe Deda kishin mundësuar futjen e Durim Bamit për të ekzekutuar vëllain e ish-politikanit, Aleksandër Ndoka. Në 30 qershor 2020 ka ndodhur atentati i pare dhe Ndreka ka filluar të marrë masat. Atentati i dytë është bërë në dhjetor 2020, në orën 17:00 një “Audi” i zi është gjuajtur me kallashnikov dhe është plagosur.
I ka mbijetuar edhe atentatit të dytë, por vendosi të largohej nga Shqipëria për t’ju shmangur një atentati tjetër, asokohe para grupit hetimor ai ka thënë se nuk ka konflikte direkt me dikë.
Aleks Deda u kthye në 6 mars të 2022 në Shqipëri. Të nesërmen ka qenë në një lokal dhe ka rënë sërish pre e një atentati, në momentin që ka dalë nga lokali, pra ai u tentua të vritej sërish një ditë pasi u kthye. Më pas në Mars 2022, ai i shpëtoi një tjetër atentati.
