Për disa orë, mungesa e Shqipërisë në deklaratën përfundimtare të Samitit të NATO-s në Ankara krijoi pikë...
AKTUALITET
Çudia në Lezhë/ Policia detyron bizneset t'u kthejë pushuesve paratë e marra mbi çmimin e referencës
PiranjatPërditësimi i fundit 12 Korrik 2026, 17:44
Pas denoncimeve të qytetarëve se në disa plazhe përgjatë vijës bregdetare të Bashkisë Lezhë është rritur çmimi i shezlongëve mbi tarifat e miratuara, ka reaguar edhe kryebashkiaku Pjerin Ndreu.
Pas denoncimeve, Ndreu tha se ka nxjerrë në terren ekipet e Policisë Bashkiake, të cilat kanë ushtruar kontrolle në vijën bregdetare, duke konstatuar edhe disa raste shkeljesh.
Në një video të publikuar nga kryebashkiaku, shihet një punonjës i Bashkisë që urdhëron punonjësin e një subjekti t'u kthejë pushuesve pjesën e parave të marra mbi çmimin e referencës së përcaktuar nga Bashkia.
Kujtojmë se, në nisje të sezonit turistik, Bashkia Lezhë përcaktoi çmimet e referencës për shërbimin e shezlongëve. Tarifat nisin nga 300 lekë në Tale, 400 lekë në Kune dhe variojnë deri në 2.000 lekë, në varësi të zonës dhe shërbimit. Ndërsa për plazhet publike, Bashkia ka caktuar një tarifë maksimale prej 700 lekësh.
Po ashtu, më herët, Ndreu bëri me dije se, pas marrjes së denoncimeve, zyrtarët bashkiakë kanë ndërhyrë menjëherë dhe kanë trajtuar problematikat konkrete.
Disa reflektime mbi ankesat e marra për çmimet e shezlloneve
Pas publikimit të numrave të telefonit, jemi përballur me një fluks të madh ankesash. Është evidente se në disa raste stacionet e plazhit, veçanërisht ato të hotelerive, kanë tejkaluar masën. Për çdo rast të denoncuar, jemi duke ndërhyrë dhe trajtuar problematikat konkrete.
Megjithatë, është e nevojshme të sqarohen disa çështje:
* Në plazhet e Lezhës, rreth 66% e vijës bregdetare është publike, ku qytetarët mund të frekuentojnë plazhin pa pagesë ose me tarifa minimale, pasi këto hapësira administrohen nga Lezha Invest.
* Plazhet e hotelerive janë të destinuara kryesisht për klientelën e tyre. Në rastet kur qytetarët zgjedhin të frekuentojnë këto ambiente, duhet të informohen paraprakisht nëse ka vende të lira. Pushuesit që zgjedhin të qëndrojnë në plazhe të administruara nga hoteleritë nuk mund të ankohen për kushtet apo çmimet, nëse janë informuar paraprakisht dhe i kanë pranuar ato.
* Nuk mund të pretendohet që 4–6 persona të akomodohen nën një çadër me dy shezllone duke paguar tarifat standarde. Kapacitetet janë të kufizuara dhe administruesi i plazhit ka të drejtën të mos pranojë situata që krijojnë mbingarkesë dhe cenojnë kushtet e shërbimit.
* Kapacitetet e parkingjeve publike janë të kufizuara dhe nuk mund të garantohet vendparkim për çdo qytetar apo pushues. Për këtë arsye duhet të shfrytëzohen edhe parkingjet private. Bashkia nuk përcakton çmimet e parkingjeve private dhe nuk ka kompetencë mbi to, përveç monitorimit të çmimeve të shezlloneve.
* Pikërisht për shkak të ankesave dhe devijimeve të konstatuara, është ndërmarrë iniciativa e publikimit të numrave të telefonit. Fatura të para disa ditëve apo opinione mbi raste të kaluara nuk ndihmojnë në zgjidhjen e problematikave aktuale. Kërkojmë që denoncimet të bëhen në ditën kur ndodh rasti, në mënyrë që ndërhyrja të jetë e menjëhershme dhe efektive.
Ne vijojmë të jemi në dispozicion të qytetarëve. Vetëm gjatë ditës së sotme, në disa stacione plazhi, klientëve u janë rikthyer pagesat pas denoncimeve të kryera.
Ftojmë çdo qytetar që të denoncojë në kohë reale çdo shkelje të konstatuar, në mënyrë që të garantojmë respektimin e rregullave dhe mbrojtjen e interesit publik.
