Vatër e re zjarri në Krujë, terreni i vështirë vështirëson ndërhyrjen e zjarrfikëseve në Krastë

Përpjekjet e dy ditëve të fundit nuk kanë mjaftuar për të vënë nën kontroll situatën, pasi një vatër e re zjarri është regjistruar pak më parë në Krastën e Krujës, pranë lagjes Bojë.

Mësohet se, zjarri ka përfshirë një sipërfaqe të gjerë me pisha dhe vatra po zgjerohet me shpejtësi të madhe. Bëhet me dije se, për shkak të terrenit, mjetet zjarrfikëse e kanë të pamundur të afrohen pranë vatrës aktive për të bërë shuarjen e flakëve.

Kjo zonë përballet me zjarre pothuajse çdo vit, ndërsa autoritetet dyshojnë se në disa raste flakët mund të jenë të qëllimshme dhe të lidhura me aktivitetin e paligjshëm të kultivimit të kanabisit.