Vatër zjarri në Këllëz të Gjirokastrës, zjarrfikëset shuajnë totalisht flakët

Një zjarr është shfaqur pasditen e sotme në hyrje të fshatit Kllëz, në Njësinë Administrative Lunxhëri.

Njoftimi për flakët është marrë rreth orës 16:05, ndërsa menjëherë drejt vendngjarjes janë nisur grupi i patrullimit që ndodhej në zonë dhe grupi i gatshëm nga stacioni zjarrfikës. Me mbërritjen në terren, është konstatuar se zjarri kishte përfshirë barishte dhe shkurre. Ndërhyrja e shpejtë e shërbimit zjarrfikës bëri të mundur shuarjen e plotë të flakëve dhe parandalimin e përhapjes së zjarrit.

Një grup i shërbimit zjarrfikës do të vijojë monitorimin e territorit për të shmangur çdo riaktivizim të mundshëm.

Nga zjarri nuk raportohet për persona të dëmtuar apo dëme materiale.