Edi Rama vijon t’u kërkojë studentëve të ulen në tryezën e dialogut, ndërsa protesta kundër qeverisë h...
AKTUALITET
VDEO/ Uji i pijshëm derdhet çdo natë në Shkozë, UKT nuk merr masa
PiranjatPërditësimi i fundit 17 December 2025, 11:28
Banorët e zonës së Shkozës në Tiranë ngrenë shqetësimin për derdhjen e përditshme të ujit të pijshëm, një problem që sipas tyre përsëritet prej kohësh dhe mbetet i pazgjidhur nga institucionet përgjegjëse.
Çdo mbrëmje, sasi të mëdha uji rrjedhin në hapësira publike, duke u humbur në tokë, ndërsa qytetarët theksojnë se bëhet fjalë për ujë të destinuar për konsum dhe jo për ujëra të bardha apo reshje shiu.
Pamjet e siguruara nga banorët tregojnë rrjedhje të konsiderueshme, të cilat jo vetëm shkaktojnë humbje të një burimi jetik, por krijojnë edhe shqetësime për infrastrukturën dhe higjienën e zonës.
Sipas tyre, situata përkeqësohet gjatë orëve të mbrëmjes, kur prurjet rriten dhe askush nuk ndërhyn për të ndalur dëmtimin.
Qytetarët shprehen se kanë njoftuar disa herë Ujësjellës-Kanalizime dhe Bashkinë e Tiranës, por deri më tani nuk kanë marrë një zgjidhje konkrete.
Ironikisht, ndërkohë që uji derdhet pa kontroll gjatë natës, zona përballet herë pas here me mungesa uji gjatë ditës, duke e bërë situatën edhe më të papranueshme për komunitetin.
Banorët kërkojnë ndërhyrje të menjëhershme për identifikimin e shkakut të rrjedhjes dhe ndalimin e humbjes së ujit të pijshëm.
Ata apelojnë për përgjegjësi institucionale dhe transparencë, duke theksuar se në një kohë kur kursimi i ujit është kthyer në domosdoshmëri, shpërdorimi i tillë përbën dëm ekonomik dhe mungesë respekti ndaj komunitetit të Shkozës.
