Veliaj firmos zbatimin e vendimit të gjykatës/ Alban Dokushi rikthehet në detyrë si sekretar i Përgjithshëm i Bashkisë së Tiranës

TIRANË- Kryebashkiaku i arrestuar i Tiranës, Erion Veliaj, ka firmosur urdhrat për zbatimin e vendimit të Gjykatës Administrative të Apelit, duke i hapur rrugë rikthimit në detyrë të Alban Dokushit si Sekretar i Përgjithshëm i Bashkisë së Tiranës.

Sipas njoftimit, urdhrat janë protokolluar në Bashkinë e Tiranës për të zbatuar vendimin përfundimtar të gjykatës. Konkretisht, Gjykata ka vendosur se largimi i Dokushit nga detyra dhe ndërprerja e marrëdhënieve të tij financiare kanë qenë të pavlefshme.

Sipas saj, këto vendime nuk kanë pasur vlerë ligjore dhe nuk kanë sjellë asnjë pasojë juridike. Me këtë vendim të formës së prerë, Alban Dokushi rikthehet në postin që mbante para se të largohej nga detyra. Firmosja e urdhrave nga kryebashkiaku shënon nisjen e zbatimit të vendimit të gjykatës.