Një pjesë protestuesish kanë përshkallëzuar aksionin e tyre në Tiranë, duke bllokuar qarkullimin në kryqëzimin pran...
AKTUALITET
Velipojë/ Pamje me armë zjarri në një lokal, avokati: Në dosje përmenden edhe punonjës policie
PiranjatPërditësimi i fundit 9 Shtator 2026, 22:24
Një video e publikuar nga avokati Arben Llangozi në Facebook rikthen në vëmendje një ngjarje të ndodhur në Gomsinë e Re, në Velipojë, ku në pamje shfaqen një kallashnikov AK-47 dhe një pistoletë.
Në materialin e tij, Llangozi i referohet edhe punonjësve të Policisë të përmendur në aktet e çështjes dhe ngre pikëpyetje mbi mënyrën se si është vijuar me verifikimin e rolit të tyre.
Reagimi:
Velipojë, AK-47 dhe pistoletë në lokal/ Pamjet u administruan, por për punonjësit e policisë nuk u mor asnjë masë Një ngjarje e rëndë e ndodhur në Gomsinë e Re, Velipojë, ku sipas akteve të çështjes janë shfaqur një kallashnikov AK-47 dhe një pistoletë, ngre pikëpyetje serioze për mënyrën se si janë trajtuar punonjësit e policisë që përmenden në këtë histori.
Në materialet e administruara dalin inicialet K. N., V. P., E. G., F. G. dhe G., ndërsa sipas informacioneve që disponojmë në ngjarje përfshihen edhe punonjës policie. Pamjet e kamerave të sigurisë janë marrë dhe administruar, deklarimet janë dokumentuar dhe dinamika e ngjarjes mund të verifikohet nga provat që ndodhen në dosje.
Por problemi është pikërisht këtu, provat janë administruar, ndërsa sipas të dhënave tona ndaj punonjësve të policisë të përfshirë nuk është marrë asnjë masë. AMP ka pasur mundësinë të verifikojë pamjet, deklarimet dhe rolin e secilit efektiv, por deri tani nuk rezulton një reagim që t'i përgjigjet seriozitetit të ngjarjes.
Kur në një dosje ke AK-47, pistoletë, pamje filmike dhe punonjës policie të përmendur, nuk mund të mjaftohesh vetëm duke futur provat në fashikull. Pyetja për AMP-në është e drejtpërdrejtë: provat u administruan, po masat ku janë?
