VENDIMI/ Mashtruan me “letrat” në tenderin e dekoderave të RTSH, Renis Tërshana dhe Artan Xhori përjashtohen 1 vit nga prokurimet

Agjencia e Prokurimit Publik ka përjashtuar për 12 muaj nga e drejta për të fituar kontrata publike kompanitë “R&T” dhe “TBS 96”.

Vendimi është marrë në fund të korrikut 2026 dhe duket se i jep fund përplasjes për mega tenderin e dekoderave të RTSH-së, i cili ka qenë shkak për një përballje disaa mujore mes institucionit dhe disa kompanive.  Kompania “R&T” është në pronësi të Renis Tërshanës, ndërsa “TBS 96” kontrollohet nga Artan Xhori.

Në fakt, gjithçka nisi pas një ankese të RTSH-së në KPP pasi kompanitë dorëzuan dokumentet e tenderit.

Sipas vendimit të APP-së, të cilin e ka parë skyweb.al, bashkimi i operatorëve kishte paraqitur dokumentacion me të dhëna të rreme për qëllime kualifikimi.

Shkelja lidhet pikërisht me tenderin për blerjen e shërbimit të mirëmbajtjes së rrjetit të shpërndarjes DVB-T2 për një periudhë 48-mujore. Pas shqyrtimit administrativ, APP arriti në përfundimin se kompanitë ndodheshin në kushtet e keqinformimit për qëllime kualifikimi.

Ligji për prokurimin publik parashikon për raste të tilla përjashtimin e operatorëve për një periudhë nga tre muaj deri në tre vjet.

Tenderi për mirëmbajtjen e rrjetit DVB-T2 ishte shoqëruar prej muajsh me përplasje dhe ankesa mes operatorëve dhe RTSH-së siç ka raportuar më herët skyweb.al.

Një procedurë e mëparshme për të njëjtin shërbim ishte zhvilluar gjatë vitit 2025, por përfundoi pa kontratë. Skualifikimet dhe anulimi i garës u kundërshtuan në Komisionin e Prokurimit Publik.

Pas përplasjeve në KPP dhe mosmbylljes së procedurës së parë, RTSH e rishpalli tenderin në vitin 2026. Në garën e re, “R&T” dhe “TBS 96” konkurruan së bashku si bashkim operatorësh ekonomikë.

RTSH i skualifikoi dy kompanitë pasi konstatoi probleme me dokumentacionin e paraqitur për kualifikim.

Më pas, institucioni iu drejtua APP-së për nisjen e procedimit administrativ ndaj tyre. Shërbimi i mirëmbajtjes së rrjetit të shpërndarjes DVB-T2 iu besua bashkimit të operatorëve “IDEA-TEL” dhe “REAL COM”.

Edhe kjo procedurë u shoqërua me kundërshtime nga kompanitë e skualifikuara.

Vendimi i fundit i APP-së konfirmon se “R&T” dhe “TBS 96” nuk mund të fitojnë kontrata publike për 12 muaj. /skyweb.al