VIDEO/ 7 orë luftë me flakët, zjarrfikësit shpëtojnë fshatrat Andon Poçi dhe Hundëkuq

Një zjarr i përmasave të mëdha përfshiu gjatë natës territorin mes fshatrave Andon Poçi dhe Hundëkuq në Gjirokastër, duke rrezikuar përhapjen e flakëve drejt zonave të banuara.

Zjarri u raportua rreth orës 22:38 dhe, sipas MZSH Gjirokastër, në terren u nisën menjëherë dy grupe shërbimi. Me mbërritjen e tyre, u konstatuan tre vatra aktive të shpërndara në dy kodra, ndërsa terreni i thyer malor dhe bimësia e dendur e bënë të pamundur ndërhyrjen me automjete zjarrfikëse.

Përballë situatës së vështirë, në operacion u angazhua i gjithë efektivi zjarrfikës. Për rreth 7 orë, ekipet luftuan me flakët në kushte të vështira, duke arritur të ndalojnë përhapjen e zjarrit në drejtim të fshatrave Andon Poçi dhe Hundëkuq.

Pas një ndërhyrjeje të gjatë dhe intensive, zjarri u vu plotësisht nën kontroll dhe u shua në orën 05:30 të mëngjesit.

Një natë e gjatë në terren dhe një betejë e vështirë me flakët, që përfundoi pa lejuar që zjarri të arrinte zonat e banuara.