Nuk ndalen zjarret. Ministria e Mbrojtjes informon se gjatë 24 orëve të fundit janë raportuar 35 vatra zjarri, nga të cilat 5 mbeten ...
AKTUALITET
VIDEO/ Banorët e Lagjes 15 në Durrës denoncojnë grumbullimin e mbetjeve pranë banesave: Po sëmuremi dita-ditës
Nga Xhuljan FerzajPërditësimi i fundit 20 Gusht 2026, 09:53
Një qytetar nga Durrësi ka dërguar një denoncim në redaksinë e Piranjat News, ku përshkruan situatën e rëndë që po kalojnë banorët e Lagjes 15 për shkak të grumbullimit të mbetjeve në një zonë të banuar.
Sipas denoncimit, problemi ndodh në rrugën “Aleksandër Goga”, tek ish-Dega e Farave (ish-Parku i Autobusëve). Banorët ankohen se aty po depozitohen mbetje të ndryshme të qytetit, përfshirë edhe mbetje nga Spitali i Durrësit, si dhe kafshë të ngordhura. Era e rëndë që vjen prej tyre e bën të pamundur hapjen e dritareve dhe dyerve, ndërsa fëmijët e vegjël dhe të moshuarit janë më të prekurit.
“Në një zonë kaq të banuar, me shtëpi private dhe pallate, ne nuk mundemi as të hapim dyert dhe dritaret për shkak të erës së tmerrshme. Po mbytemi nga era e keqe dhe po sëmurëmi dita-ditës,” shkruan qytetari në denoncimin e tij.
Sipas tij, banorët kanë bërë disa herë ankesa dhe denoncime në Bashkinë e Durrësit. Madje kanë mbledhur firmën e të gjithë banorëve të lagjes dhe i kanë dorëzuar, por deri tani nuk ka pasur asnjë reagim. Askush nga institucionet nuk ka shkuar për të parë nga afër situatën.
Sot banorët kanë dalë në protestë. Sipas denoncuesit, në vendngjarje kanë qenë të pranishme edhe disa media. Piranjat News do të ndjekë këtë çështje dhe pret reagimin e Bashkisë së Durrësit dhe institucioneve të tjera përgjegjëse./Piranjat News
