VIDEO/ Pitbulli sulmoi vajzën 4-vjeçare, dalin pamjet e ngjarjes së rëndë në Vlorë

Publikohen pamjet e ngjarjes së rëndë të ndodhur në zonën e Lungomares në Vlorë, ku një qen i racës pitbull sulmoi një vajzë 4-vjeçare, duke i shkaktuar plagë në kokë.

Videoja e kapur nga kamerat e sigurisë të bizneseve pranë vendit të ngjarjes tregon momentin kur qeni lëviz i lirë në zonë dhe më pas sulmon papritur të miturën, e cila ndodhej nën shoqërinë e gjyshes së saj.

Në pamje shihet se gjithçka ndodh brenda pak sekondash, ndërsa të pranishmit reagojnë menjëherë për të ndërhyrë dhe për të larguar kafshën nga vajza e vogël. Falë ndërhyrjes së qytetarëve është bërë e mundur shkëputja e qenit dhe shmangia e pasojave edhe më të rënda.

Si pasojë e sulmit, 4-vjeçarja ka pësuar dëmtime në pjesën e kokës dhe është transportuar menjëherë drejt Spitalit Rajonal të Vlorës, ku po merr ndihmën e nevojshme mjekësore.

Burime nga vendi i ngjarjes bëjnë me dije se qeni dyshohet të jetë pa pronar dhe lëvizte i lirë në zonë. Pas incidentit, kafsha është mbajtur e lidhur dhe pritet të merret në administrim nga autoritetet përkatëse për t’u dërguar në një qendër të posaçme për trajtimin e kafshëve.