VIDEO/ Tym dhe rrënoja, çfarë la pas zjarri që shkaktoi 3 viktima në Shkodër

Pamjet që shikoni në videon e mëposhtme janë nga fshati Domen, Shkodër, aty ku një banesë u përfshi nga flakët dhe si pasojë humbën jetën 24-vjeçarja Bleona Çelaj dhe dy fëmijët e saj të mitur. Ngjarja u raportua rreth orës 13:10, ku zjarri i përmasave të mëdha, shkrumboi godinën, nga e cila, siç shihet në pamjet e mëposhtme kanë mbetur vetëm rrënojat.

Dyshimet paraprake të grupit hetimor janë se tragjedia ka ndodhur kur gruaja ka ndezur një bombol 5 litroshe të gazit për të gatuar, e cila ka shpërthyer menjëherë duke i marrë jetën asaj dhe fëmijëve. Si pasojë e presionit të lartë ka rënë edhe çatia e banesës dhe gruaja me 2 të vegjëlit e saj janë djegur brenda shtëpisë.

Një qytetar ka parë zjarrin nga një distancë e largët dhe ka telefonuar zjarrfikësit, por ndërhyrja e këtyre të fundit thuhet se është vështirësuar për shkak të terrenit të thyer, pasi banesa ndodhet rreth 30 minuta në këmbë larg rrugës kryesore.

Grupi hetimor, nën drejtimin e Prokurorisë, ka nisur hetimet për zbardhjen e plotë të kësaj tragjedie.