Një studente e Mjekësisë, e cila i është bashkuar protestës përpara Ministrisë së Arsimit, ka ngritur shqetësi...
AKTUALITET
Vizita e Gonzatos në GJKKO, Ambasada e BE zbardh bisedimet me kreun e gjykatës Erion Bani
PiranjatPërditësimi i fundit 15 May 2026, 13:27
Ambasada e Bashkimit Evropian në Shqipëri ka zbardhur sot (15 maj) vizitën e ambasadorit Silvio Gonzato në Gjykatën e Posaçme dhe takimin me kryetarin e saj, Erion Bani.
Me një njoftim të lëshuar, theksohet se përveç vizitës për godinën e financuar nga BE së fundmi të rikonstruktuar, u diskutua edhe për rolin e drejtësisë në forcimin e besimit të publikut dhe rritja e standardeve, për të përmbushur standardet e BE.
“Vizituam godinën e Gjykatës së Posaçme kundër Korrupsionit dhe Krimit të Organizuar, e cila është financuar nga BE dhe së fundmi është rikonstruktuar për të përmbushur standardet më të larta të BE-së. Ne mirëpresim faktin që 80% e kostos së rikonstruksionit u financua përmes ripërdorimit të aseteve të konfiskuara”, thuhet në njoftimin zyrtar.
Më tej theksohet edhe tematika e bisedës mes ambasadorit dhe kreut të GJKKO, ku vihet në dukje edhe investimi në infrastrukturën gjyqësore.
“Gjatë vizitës, Kryetari në detyrë i Gjykatës së Posaçme të Shkallës së Parë, gjyqtari Erion Bani, dhe Ambasadori i BE-së, Silvio Gonzato, diskutuan rolin e Gjykatës në forcimin e besimit të publikut te sistemi i drejtësisë dhe në ruajtjen e standardeve të larta në vendimmarrje. Ambasadori i BE-së theksoi gjithashtu se përmirësimi i standardeve të infrastrukturës gjyqësore duhet të mbetet prioritet në të gjithë Shqipërinë, për të garantuar siguri, transparencë dhe akses në drejtësi”, nënvizon ambasada e BE.
