Vrasja e Santiago Malkos/ Del para Apelit të GJKKO-së Ilir Selmani, shtyhet seanca

I dënuar me 26 vite burg për vrasjen e ish-policit Santiago Malko, Ilir Selmani është paraqitur sot në Apelin e Posaçëm të Gjykatës së Posaçme, ku po shqyrtohet çështja e tij në rigjykim.

Selmani, i cili aktualisht ndodhet në masën e sigurisë “arrest shtëpie”, është shoqëruar për seancën e radhës, e cila do të zhvillohet në datën 7 korrik.

Gjatë kësaj periudhe ai do të vijojë të qëndrojë në arrest shtëpie, pasi masa iu caktua pas skadimit të afatit të paraburgimit dhe kthimit të çështjes për rigjykim nga Gjykata e Lartë në Apelin e GJKKO.

Seanca u shty pasi mbrojtja ligjore nuk kishte përgatitur konkluzionet përfundimtare. Gjykata pranoi gjithashtu kërkesën për ndryshim të vendbanimit, për shkak të kushteve të jetesës.

Selmani është shpallur fajtor nga GJKKO si pjesë e grupit të njohur si “Duka”, në lidhje me ekzekutimin e Santiago Malkos.

Në një zhvillim të ndodhur mbrëmjen e së hënës, pranë banesës së tij të ruajtur nga forca policie, është ndaluar një person i armatosur, Emiljano Nina, i njohur si person pranë Ervis Martinajt. Ngjarja ka ngritur dyshime për një tentativë të mundshme hakmarrjeje, ndërsa hetimet vijojnë.