Vrasja e tregtarit Besnik Hida në Lushnjë, SPAK mbyll hetimet dhe dërgon dosjen për gjykim

Dosja për vrasjen e biznesmenit Besnik Hida në Lushnjë i ka kaluar gjykatës, pas përfundimit të hetimeve nga SPAK.

Prokuroria e Posaçme kërkon që Ardjan Ahmetaj të përballet me drejtësinë si i përfshirë në krim, ndërsa për Laert Haxhiun dhe Orgest Bilbilin ka kërkuar mbylljen e procedimit për shkak të mungesës së provave.

Sipas organit të akuzës, Ahmetaj dyshohet se ka ndihmuar në ekzekutimin e Hidës, i cili u qëllua për vdekje më 1 tetor 2019, teksa ndodhej në një lokal në lagjen “Skënder Libohova” të Lushnjës.

Autorët e drejtpërdrejtë të atentatit mbeten ende të paidentifikuar, pasi kanë vepruar të maskuar. Hetimet e SPAK-ut e konsiderojnë Ahmetajn si personin që ka ofruar mbështetje për realizimin e ngjarjes.