Vrau me armë zjarri shokun e fëmijërisë, Gjykata e Korçës cakton "arrest me burg" për Kristjan Sterjon

Gjykata e Korçës ka lënë në burg Kristjan Sterjon, 20-vjeçarin i cili akuzohet për vrasjen e Johan Zukos. Në lidhje me këtë gjykata ka caktuar ndaj tij masën e sigurisë “Arrest në burg” . Ai mbërriti ditën e sotme në Gjykatën e Korçës nën masa të rrepta sigurie, ndërsa akuzohet për veprën penale “Vrasje me paramendim”, si dhe për “Mbajtja pa leje dhe prodhimi i armëve, armëve shpërthyese dhe municionit”.

Më herët gjatë dëshmisë së tij para policisë, Sterjo ka deklaruar se konflikti me viktimën lidhej me disa episode të mëparshme, duke shtuar se ajo e cila ka sjellë agravimin e situatës ka qenë ngacmimi i të dashurës së tij. Hetuesit po verifikojnë edhe konfliktet e mëparshme mes dy të rinjve, të cilët dyshohet se kishin pasur përplasje për shkak të rivalitetit mes tyre dhe pretendimeve se kush ishte "i forti i lagjes". Dyshohet autori i dyshuar dhe viktima ishin konfliktuar verbalisht disa ditë përpara ngjarjes. 

Kristjan Sterjo njihet si një nga personat me precedentë dhe problematika të theksuara në qytetin e Korçës, i njohur gjithashtu për një stil jetese të shkujdesur, ndërsa tani do të përballet me drejtësinë për akuzën e rëndë të vrasjes.