Zjarr në Lazarat, ndërhyrja e shpejtë e zjarrfikësve shmang përhapjen e flakëve

Një zjarr është regjistruar mbrëmjen e kësaj të shtune në fshatin Lazarat.

Sipas informacioneve, rreth orës 19:50 është marrë njoftimi për rënien e zjarrit. Me mbërritjen e forcave zjarrfikëse në vendngjarje, u konstatua se flakët kishin dy vatra aktive, të cilat po merrnin përmasa dhe rrezikonin të përhapeshin.

Falë ndërhyrjes së shpejtë dhe profesionale të shërbimit zjarrfikës, u bë i mundur izolimi dhe fikja e plotë e zjarrit, duke shmangur përhapjen e tij në zona të tjera.

Si pasojë e flakëve, u dogj një sipërfaqe e vogël me barishte dhe shkurre, pa shkaktuar dëme të tjera materiale.

Ndërkohë, organet ligjzbatuese po punojnë për zbardhjen e plotë të rrethanave dhe shkaqeve të rënies së zjarrit.