Zjarri në Priskën e Madhe, zjarrfikësi: Dendësia e madhe e pyllit dhe era po favorizojnë përhapjen e flakëve  

Situata me zjarrin në Priskën e Madhe vijon të jetë problematike, ndërsa forcat zjarrfikëse ndodhen në terren dhe po punojnë intensivisht për izolimin e vatrës së zjarrit dhe shuarjen e plotë të saj. Dendësia e madhe e pyllit po vështirëson ndërhyrjen e tyre, ndërsa përhapja e flakëve po favorizohet edhe nga era e fortë. 

Gjatë një prononcimi për mediat një zjarrfikës u shpreh se situata është e komplikuar, pasi dendësia e pyllit është e madhe dhe është e vështirë të luftohet në mënyrë direkte. Ai theksoi se puna ka vijuar për 24 orë, por era po favorizon intenistetin dhe përhapjen e zjarrit.

“Kemi ardhur sot në mëngjes, kemi zëvendësuar dy grupe të tjera që kanë qenë në gatishmëri dhe shërbim 24 orë. Jemi dy grupe të stacionit tonë, plus 5 stacione të Drejtorisë së Tiranës. Situata është e komplikuar, sepse dendësia e pyllit është e madhe dhe është e vështirë ta luftojmë në mënyrë direkte. Flakët po i favorizon edhe era, por po mundohemi ta mbajmë të izoluar”, shprehet zjarrfikësi.