Ka qenë ministrja për Shtetin dhe Parlamentin, Erjona Ismaili, ajo që ka reaguar pas mbledhjes së qeverisë lidhur me akuzat e pretend...
AKTUALITET
“Zoti Rama nuk duam një Gërdec të dytë”/ Banorët e Kodër Babrrusë kundër KAYO-s
PiranjatPërditësimi i fundit 19 Dhjetor 2025, 20:42
Në Kodër Babrru të Kamzës, frika ka zëvendësuar qetësinë. Vetëm pak metra larg shtëpive, qeveria ka vendosur ngritjen e fabrikës së armatimit KAYO, në ish-repartin mekanik, pa asnjë konsultim me komunitetin dhe pa transparencë. Banorët flasin për një rrezik real për jetën: “Nuk është normale të prodhosh fishekë e municione në mes të lagjes. Këtu rrezikohemi të gjithë”.
Por krahas rrezikut, po zhvillohet edhe një proces i paprecedentë i marrjes së pronave private. Me vendim qeverie, territori i ish-reparteve 3200 m² dhe 64000 m² është shtrirë përtej çdo kufiri ligjor.
“Kanë ardhur me ushtri e polici, pa afishim, pa njoftim, na kanë mbyllur derën e pronës me dryn. Piketa janë vendosur pranë dritareve, janë hequr tabelat “pronë private” dhe janë bllokuar rrugët e aksesit duke na marrë të gjitha pronat që i kemi trashëguar që nga 1929, përfshirë tokat e lira”, dëshmojnë banorët.
Ata thonë se sipas Kadastrës, tokat janë të regjistruara në emër të pronarëve, me certifikata, vendime gjykatash dhe kthime nga Komisioni i Pronave. Megjithatë, shteti refuzon t’i njohë.
Na thonë: ikni në gjykatë. Po ne nuk kemi lekë për gjyqe, kemi shtëpitë dhe jetën këtu. Banorët i janë drejtuar Prokurorisë dhe SPAK-ut, por heshtja vazhdon.
“Në BE, kur shtetit i duhet një pronë, bëhet shpronësimi dhe qytetari dëmshpërblehet. Jo të të marrin tokën me forcë”.
Sot, në Kodër Babrru, shteti nuk po garanton as sigurinë, as pronën. Dhe pyetja mbetet: “A ka drejtësi ky vend?”
Ndërkohë banorët deklarojnë se do të ngujohen para kryeministrisë nëse nuk anulohet vendimi për fabrikën e municioneve si dhe nëse nuk i jepet zgjidhje problemit të pronës.
