Microsoft po ofron një plan të ri për largim vullnetar nga puna për rreth 60,000 punonjës në Shtetet e Bashkuara, Kanada, Indi dh...
BOTA
Kokainë dhe armë, arrestohet i riu shqiptar në Itali. Detaje nga operacioni
PiranjatPërditësimi i fundit 17 February 2026, 18:18
Një 30-vjeçar shqiptar është arrestuar në flagrancë në qytetin e Rimini me akuzën e posedimit të lëndëve narkotike me qëllim shpërndarjen.
Sipas autoriteteve italiane, gjatë kontrollit iu sekuestruan pak më shumë se një kilogram kokainë, si dhe disa doza të paketuara paraprakisht, gati për shitje. Në posedim iu gjet edhe një pistoletë gjysmëautomatike, e cila rezultoi të ishte lodër – një kopje e një arme reale, e dyshuar se përdorej për vetëmbrojtje gjatë aktivitetit të paligjshëm.
Hetimet kishin zbuluar një rrjet të dyshuar shpërndarjeje, ndërsa i riu dyshohej se kryente shitje të shumta duke përdorur automjetin e tij. Makina parkonte pranë një pallati ku ishte raportuar një fluks i vazhdueshëm personash që qëndronin vetëm për pak minuta.
Oficerët identifikuan automjetin dhe e ndaluan 30-vjeçarin teksa po qarkullonte në qytet. Kontrolli i mëvonshëm çoi në zbulimin e sasisë së konsiderueshme të kokainës dhe materialeve të tjera të lidhura me aktivitetin e dyshuar kriminal.
Pas përfundimit të veprimeve hetimore, shqiptari u arrestua dhe u dërgua në Burgun e Riminit, ku do të qëndrojë në dispozicion të autoriteteve gjyqësore italiane.
