Sulm kibernetik në Poloni, ekspozohen të dhënat e rreth 19 milionë qytetarëve

Polonia është përballur me një prej incidenteve më të mëdha kibernetike të regjistruara në vend, ku të dhënat personale dhe mjekësore të rreth 19 milionë qytetarëve dyshohet se janë komprometuar.

Sulmi goditi një kompani që ofron shërbime softuerike për sektorin shëndetësor, ndërsa informacionet e marra nga hakerët arrijnë në rreth dy terabajt.

Ministri polak i Çështjeve Dixhitale, Krzysztof Gawkowski, e cilësoi ngjarjen si një nga sulmet më serioze kibernetike në historinë e vendit. Megjithatë, autoritetet nuk kanë gjetur deri tani prova që incidenti të jetë organizuar nga Rusia apo ndonjë shtet tjetër.

Sipas hetimeve paraprake, pas sulmit mund të fshihet një motiv financiar. Ministri deklaroi se qeveria nuk do të paguajë shpërblim për autorët dhe paralajmëroi masa të ashpra ligjore ndaj personave përgjegjës.

Të dhënat e komprometuara përfshijnë informacione mbi vizitat te mjeku, recetat, dokumentacionin shëndetësor dhe të dhëna të tjera të përdorura për ndjekjen e pacientëve. Autoritetet theksojnë se informacionet e ekspozuara nuk janë të njëjta për të gjithë qytetarët.

Rreth 12 mijë institucione shëndetësore kishin përdorur shërbimet e kompanisë së goditur nga sulmi.

Ndërkohë, autoritetet polake kanë nisur hetimet dhe po përgatisin një mekanizëm përmes të cilit qytetarët do të mund të kontrollojnë nëse të dhënat e tyre janë prekur nga kjo rrjedhje masive.