Sulm masiv me dronë në Moskë, raportohen dy të vrarë dhe gjashtë të plagosur

Një sulm masiv me dronë ka goditur gjatë natës rajonin e Moskës, duke shkaktuar dy viktima dhe gjashtë të plagosur. Autoritetet ruse raportuan gjithashtu dëme në ndërtesa banimi dhe një kompleks deposh, ndërsa një rafineri nafte në kryeqytet u prek nga sulmi. 

Sipas raportimeve nga mediat e huaja, Guvernatori i rajonit të Moskës, Andrei Vorobyov, deklaroi se gjatë një periudhe prej dy orësh, nga ora 03:00 deri në 05:00, mbrojtja ajrore ruse dhe sistemet e luftës elektronike rrëzuan ose neutralizuan 249 dronë në 17 zona. Një grua 44-vjeçare humbi jetën pasi një dron goditi një ndërtesë banimi, ndërsa një tjetër person vdiq pasi një banesë private u përfshi nga zjarri.

Gjashtë persona të tjerë mbetën të plagosur, mes tyre edhe dy fëmijë. Në qytetin e Moskës, kryebashkiaku Sergei Sobyanin tha se disa dronë arritën deri në territorin e rafinerisë së naftës së Moskës, ndërsa një tjetër goditi një ndërtesë banimi. Nga sulmi u raportuan edhe zjarre dhe dëmtime të tjera në rajon.

Për shkak të situatës, disa aeroporte në zonën e Moskës vendosën përkohësisht kufizime në fluturime. Autoritetet ruse e kanë cilësuar sulmin si një nga më të mëdhenjtë e kryer ndaj rajonit, ndërsa Ukraina nuk ka marrë përgjegjësinë për sulmin.