Presidenti i Shteteve të Bashkuara, Donald Trump, ka deklaruar se është “absurde” që Uashingtoni të vazhdojë të...
BOTA
250-vjetori i Pavarësisë, Papa Leoni mesazh SHBA-së: Të mbetet besnike idealeve të lirisë dhe unitetit
PiranjatPërditësimi i fundit 3 Korrik 2026, 18:53
Papa Leoni XIV u bëri thirrje Shteteve të Bashkuara të ruajnë idealet themeluese të lirisë, drejtësisë dhe unitetit, në një mesazh me video drejtuar ceremonisë së ndarjes së Medaljes së Lirisë në Filadelfia, në prag të 250-vjetorit të Deklaratës së Pavarësisë.
Gjatë fjalimit, Ati i Shenjtë kujtoi se Amerika është ndërtuar mbi kontributin e brezave të emigrantëve dhe vlerësoi rolin historik të vendit në mbrojtjen e lirisë. Duke cituar Deklaratën e Pavarësisë, ai u ndal te të drejtat e patjetërsueshme për jetën, lirinë dhe kërkimin e lumturisë, duke theksuar se dinjiteti njerëzor është themeli i çdo shteti.
Papa kërkoi një debat publik të karakterizuar nga moderimi, respekti për mendimet e ndryshme dhe kërkimi i pikave të përbashkëta, me synimin për të promovuar paqen dhe pajtimin si brenda vendit ashtu edhe në arenën ndërkombëtare.
Ai theksoi gjithashtu rëndësinë e mbrojtjes së jetës në çdo fazë, nga ngjizja deri në vdekjen natyrore, si dhe mbrojtjen e lirisë fetare dhe dialogut ndërfetar.
Në përfundim, Papa Leoni XIV bëri thirrje për forcimin e unitetit kombëtar, duke nënvizuar se prosperiteti i një vendi mbështetet në ideale të përhershme dhe jo në objektiva afatshkurtra.
Pas ceremonisë, Papa do të udhëtojë në ishullin italian të Lampeduzës, një simbol i krizës së migracionit në Mesdhe, ku pritet të përcjellë një mesazh në mbështetje të emigrantëve dhe refugjatëve.
