Kreu i PD Sali Berisha është kthyer në Tiranë pas vizitës në SHBA, ku në një prononcim të shkurtër nga Rinasi ...
BOTA
Aktores 90-vjeçare i sekuestron 20 milionë euro pasuri
PiranjatPërditësimi i fundit 26 Mars 2026, 18:12
Janë sekuestruar paraprakisht rreth 20 milionë euro pasuri të paluajtshme që i përkasin aktores së njohur Ursula Andress. Sipas hetimeve të zhvilluara nga Drejtoria Anti-Mafia e Firences, kjo shumë dyshohet të jetë përfitim nga veprat penale të pastrimit të parave dhe vetëpastrimit, në dëm të aktores, e cila tashmë është 90 vjeçe. Vetë Andress kishte denoncuar rastin pranë autoriteteve gjyqësore në kantonin Vaud, në Zvicër.
Aktorja kishte raportuar një varfërim të vazhdueshëm të pasurisë së saj, që sipas akuzës ishte shkaktuar nga persona të ngarkuar me menaxhimin e financave. Guardia di Finanza ka sekuestruar 11 prona luksoze si dhe 14 parcela toke me vreshta dhe ullishte në zonën rurale të San Casciano in Val di Pesa.
Sekuestrimi është kryer mëngjesin e sotëm dhe përfshin edhe pronën “Palazzo al Bosco”, një hapësirë e dedikuar kulturës bashkëkohore në kodrat e San Casciano in Val di Pesa, pranë Firenzes. Janë vendosur gjithashtu sekuestro edhe mbi disa vepra arti të mbledhura nga Carolina Freymond dhe Eric Freymond, ky i fundit ish-menaxher i pasurisë së Ursula Andress, i cili ka ndërruar jetë me vetëvrasje në vitin 2025.
Sipas Antimafias së Firences, të ardhurat e përfituara nga mashtrimi në dëm të aktores së njohur janë investuar në menaxhimin e kompleksit imobiliar, që përfshin vilën dhe një pronë prej 18 hektarësh, si dhe në blerjen e disa pikturave. Për këtë arsye, nën hetim është vënë e veja e promotorit financiar, me akuzat për pastrim parash dhe vetëpastrim. Ndërkohë, dy profesionistë të tjerë janë nën hetim nga autoritetet zvicerane për mashtrim.
Njësia e Policisë Ekonomiko-Financiare e Guardia di Finanza ka rindërtuar të gjithë zinxhirin e parave të paligjshme përmes analizave të detajuara dokumentare, verifikimeve bankare, rindërtimit të strukturave shoqërore dhe krahasimit të të dhënave pasurore dhe financiare. Hetuesit kanë përdorur metoda të avancuara kundër pastrimit të parave, të fokusuara në rikrijimin e të ashtuquajturit “paper trail”, që lejon gjurmimin e rrugës së ndjekur nga fondet e devijuara dhe identifikimin e riinvestimit të tyre në pasuri luksoze dhe asete me vlerë të lartë ekonomike. /PiranjatNews/
