Autobusi përplaset me kamionçinën, pesë të vdekur e 27 persona të plagosur

Të paktën pesë persona kanë humbur jetën dhe 27 të tjerë janë plagosur si pasojë e një aksidenti të rëndë rrugor në rrugën shtetërore Ternana 79, pranë Colli sul Velino, në kufirin mes rajoneve Lazio dhe Umbria në Itali.

Sipas të dhënave paraprake, në aksident janë përfshirë një autobus, një kamionçinë dhe tre automjete. Shkaqet e përplasjes mbeten ende të paqarta dhe po hetohen nga autoritetet.

Shërbimi i emergjencës Ares 118 bëri të ditur se tre persona, të plagosur rëndë, u transportuan me helikopter drejt spitaleve, ndërsa 24 të plagosur të tjerë, me lëndime të klasifikuara si kode të verdha dhe të gjelbra, u dërguan në spitale të ndryshme të zonës.

Në vendngjarje ndërhynë ekipe të shumta të emergjencës, përfshirë personelin e 118, zjarrfikësit dhe forcat e policisë, të cilët zhvilluan operacionet e shpëtimit dhe siguruan zonën për hetimet që do të zbardhin rrethanat e aksidentit.