Era e fortë dhe deti i trazuar kanë ndryshuar panoramën në bregdetin e Vlorës mesditën e kësaj të diele, duke detyruar...
BOTA
Balona kontrabandiste nga Bjellorusia, Lituania shpall gjendje të jashtëzakonshme
PiranjatPërditësimi i fundit 9 Dhjetor 2025, 09:28
Lituania shpalli të hënën gjendjen e jashtëzakonshme, pasi autoritetet njoftuan se balonat e dërguara nga kontrabandistët nga Bjellorusia po paraqesin një kërcënim serioz ndaj sigurisë publike. Sipas qeverisë, kontrabandistët po përdorin balona meteorologjike për të transportuar cigare përtej kufirit, një praktikë që ka detyruar aeroportin e Vilniusit të pezullojë në mënyrë të përsëritur operacionet dhe të ndërpresë trafikun ajror.
“Gjendja e jashtëzakonshme po shpallet jo vetëm për shkak të problemeve në aviacionin civil, por edhe për arsye të sigurisë kombëtare,” deklaroi ministri i Brendshëm lituanez, Vladislavs Kondratovics, gjatë një mbledhjeje të kabinetit të transmetuar drejtpërdrejt. Sipas tij, vendimi i jep ushtrisë kompetenca të zgjeruara operacionale, duke lejuar ndërhyrje në bashkëpunim me policinë ose edhe në mënyrë të pavarur. Megjithatë, ministri nuk dha detaje të mëtejshme mbi masat konkrete që do të ndërmerren. Ende nuk dihet sa kohë do të zgjasë gjendja e jashtëzakonshme.
Bjellorusia ka mohuar çdo përgjegjësi për incidentet dhe ka akuzuar Lituaninë për provokime, përfshirë dërgimin e një droni që pretendohet se ka hedhur “materiale ekstremiste”. Lituania, anëtare e BE-së dhe NATO-s, i hodhi poshtë këto pretendime. Presidentja e Komisionit Evropian, Ursula von der Leyen, paralajmëroi më 1 dhjetor se situata në kufi po “përkeqësohej”, duke i quajtur balonat bjelloruse një “sulm hibrid” krejtësisht të papranueshëm.
Lituania ka vendosur më herët gjendje të jashtëzakonshme në kufi: në vitin 2021 pas rritjes së migrimit të parregullt nga Bjellorusia dhe në vitin 2022, pas pushtimit rus të Ukrainës, mes frikës për një kërcënim të mundshëm edhe ndaj saj. Në atë periudhë, vendi vendosi kufizime mbi lirinë e fjalës për të frenuar propagandën ruse.
