Tenderi 50 milionë euro për mirëmbajtjen e akseve rrugore kombëtare është është shndërruar në një skandal...
BOTA
Braktisën zyrat për delet: Puna e pazakontë që po josh të diplomuarit në Kinë
PiranjatPërditësimi i fundit 4 Qershor 2026, 10:34
Një nga vendet e punës më të kërkuara në Kinë këtë sezon nuk ishte në ndonjë zyrë moderne në qytet, por në kullotat e gjera të veriut të vendit. Një shpallje e publikuar në prill për dy persona që do të kujdeseshin për dele u kthye shpejt në një fenomen viral. Oferta u drejtohej çifteve dhe përfshinte një pagë mujore të kombinuar prej 16 mijë juanësh (rreth 2,400 dollarë), si dhe ushqim, strehim dhe internet falas.
Shpallja tërhoqi miliona shikime dhe qindra aplikime nga të rinj që dëshironin t’i shpëtonin stresit të jetës urbane. Në rrjetin social kinez Weibo, një hashtag i lidhur me këtë punë grumbulloi rreth 59 milionë shikime.
“Është më e lehtë të merresh me dele sesa me njerëz,” shkroi një përdorues, ndërsa një tjetër e quajti atë “punën e ëndrrave”, sepse i lejonte të largohej nga jeta e ndërlikuar e qytetit dhe të jetonte më thjesht.
Pronari 45-vjeçar i fermës së deleve në rajonin e Inner Mongolia, Zuo Xiaoyong, tha se u habit kur mori mbi 1,000 aplikime vetëm brenda 48 orëve nga publikimi i shpalljes. Rreth 10% e aplikantëve kishin diplomë universitare.
Sipas tij, shumica e aplikantëve ishin fermerë, punëtorë fabrikash dhe të sapodiplomuar nga qytetet e mëdha kineze.
Interesi i madh për këtë punë vjen në një kohë kur papunësia e të rinjve në qytete ka arritur në 16.3%, ndërsa konkurrenca në tregun e punës është bërë më e ashpër për shkak të numrit rekord prej 12.7 milionë studentësh që diplomohen këtë vit në universitetet kineze.
Të dhënat tregojnë se vendet e punës për personat me diplomë master janë zvogëluar, ndërsa kërkesa për të diplomuarit në arsimin profesional është rritur.
Ekspertët thonë se ekziston një mospërputhje mes aftësive, pritshmërive dhe mundësive reale të punësimit.
“Kur të rinjtë diplomohen dhe nuk kanë shumë për të treguar si rezultat i viteve të studimit, kjo është shumë demoralizuese,” tha Stuart Gietel-Basten.
Sipas tij, kjo situatë po krijon ndjenja dëshpërimi dhe dëshirë për t’u larguar nga realiteti i përditshëm.
Megjithëse jeta e bariut mund të tingëllojë romantike, puna është larg të qenit e lehtë. Detyrat përfshijnë kullotjen, ushqimin dhe numërimin e 3,000 deleve në një sipërfaqe prej afro 130 kilometrash katrorë, duke përdorur kalë ose motoçikletë dhe me shumë pak kontakt me njerëzit.
Një nga aplikantët që i la më shumë përshtypje pronarit ishte një i sapodiplomuar nga jugu i Kinës, i cili këmbëngulte se mund ta bënte punën. “I thashë se këtu nuk ka fare njerëz, e jo më gra. Nuk do të gjesh as të dashur,” tregoi Zuo. Por i riu nuk u tërhoq.
“Ai më tha se fillimisht donte të gjente një punë dhe të fitonte para,” tha fermeri. Sipas të dhënave zyrtare, numri i martesave në Kinë po bie, pasi shumë të rinj po i japin përparësi karrierës dhe stabilitetit ekonomik përpara krijimit të familjes.
Megjithatë, pavarësisht entuziazmit të të rinjve, Zuo vendosi të punësojë një çift me përvojë të mëparshme në këtë profesion, duke u ofruar një pagë vjetore totale prej rreth 200 mijë juanësh (afërsisht 30 mijë dollarë).
Ndërsa entuziazmi në rrjetet sociale filloi të zbehej, shumë njerëz kuptuan se pas asaj që dukej si “puna e ëndrrave” fshihej një realitet i vështirë.“Nuk besoj se do të mund t’i numëroja saktë kaq shumë dele,” shkroi një përdorues.
“Është një punë shumë e lodhshme. Nuk është pushim, por punë e vërtetë,” komentoi një tjetër. Megjithatë, për shumë të rinj që ndihen të bllokuar në garën e pafundme të jetës urbane, kullotat e vetmuara ofrojnë diçka që qyteti nuk mund ta japë. “Këtu nuk ka debate, mashtrime apo marrëdhënie të komplikuara pune si në kompanitë e mëdha,” tha Zuo. “Ka vetëm bagëti dhe dele.”/Përktheu Piranjat News
