Brazili hap dosjen ndaj “Lulinha”, djali i presidentit Lula nën hetim për...

Djali i presidentit brazilian Luiz Inácio Lula da Silva, Fabio Luis Lula da Silva, është vendosur nën hetim nga Policia Federale e Brazilit pas dyshimeve për përdorim të ndikimit të tij në favor të një lobisti pranë Ministrisë së Shëndetësisë.

Vendimi për nisjen e hetimeve është autorizuar nga një gjyqtar i Gjykatës së Lartë të Brazilit, pas kërkesës së Policisë Federale për të verifikuar rolin e Fabio Luis, i njohur ndryshe si “Lulinha”, në një çështje që lidhet me një kontratë qeveritare për furnizimin me ilaçe me bazë kanabidioli (CBD).

Sipas hetuesve, djali i presidentit dyshohet se ka ndihmuar kompani të lidhura me biznesmenin Antonio Carlos Camilo Antunes për të krijuar kontakte me zyrtarë të Ministrisë së Shëndetësisë dhe për të lehtësuar komunikimin lidhur me marrëveshjen.

Hetimi po zhvillohet nën dyshimet për trafik ndikimi dhe korrupsion, ndërsa autoritetet po mbledhin të dhëna për të përcaktuar nëse ka pasur ndërhyrje të paligjshme në proceset administrative të ministrisë.

Deri tani, Fabio Luis Lula da Silva nuk është shpallur fajtor dhe hetimi synon të sqarojë nëse ka pasur shkelje gjatë përpjekjeve për të ndërmjetësuar kontaktet mes kompanive private dhe institucioneve shtetërore.