Britania shqyrton goditjen tregtare ndaj Izraelit/ Në fokus marrëveshja preferenciale pas situatës në Gaza

Britania e Madhe ka nisur një vlerësim për mundësinë e pezullimit të marrëveshjes tregtare me Izraelin, një lëvizje që vjen pas presioneve ndërkombëtare lidhur me situatën në Gaza dhe Bregun Perëndimor.

Departamenti britanik për Biznes dhe Tregti zhvilloi verën e kaluar një analizë mbi ndikimin e mundshëm të pezullimit të Marrëveshjes së Partneritetit Tregtar Britani e Madhe-Izrael, e cila u vendos pas Brexit-it dhe u lejon produkteve izraelite trajtim preferencial në tregun britanik.

Vlerësimi ka marrë në konsideratë pasojat ekonomike dhe sociale të një vendimi të tillë, ndërsa qeveria britanike e ka lidhur këtë proces me reagimin ndaj politikave të Izraelit në territoret palestineze.

Në maj të vitit të kaluar, Londra pezulloi negociatat për një marrëveshje të re të tregtisë së lirë me Izraelin, pas kritikave ndaj deklaratave të zyrtarëve izraelitë për operacionet në Gaza.

Megjithatë, marrëveshja aktuale tregtare ka mbetur ende në fuqi, me zyrtarë britanikë që kanë paralajmëruar se pezullimi i saj mund të sjellë pasoja të rëndësishme për bizneset dhe mijëra vende pune në Mbretërinë e Bashkuar.

Çështja është rikthyer në qendër të vëmendjes pas përkeqësimit të situatës humanitare në Gaza dhe debatit në nivel evropian për kufizimin e marrëdhënieve tregtare me Izraelin.