Copëzat e dronëve vrasin 6 persona në plazh, 40 të tjerë të plagosur

Të paktën gjashtë persona, mes tyre tre fëmijë, kanë humbur jetën, ndërsa 40 të tjerë janë plagosur, 17 prej të cilëve janë dërguar në spital, pasi fragmente nga një dron ukrainas ranë në një plazh të mbushur me pushues në vendpushimin bregdetar Arkhipo-Osipovka, pranë Gelendzhik, në bregdetin rus të Detit të Zi.

Bilanci i përditësuar u bë i ditur nga guvernatori i rajonit të Krasnodarit, Veniamin Kondratyev.

Guvernatori akuzoi Ukrainën se kishte në shënjestër infrastrukturën civile dhe e cilësoi incidentin si një "tragjedi".

"Në këtë moment të vështirë, shpreh ngushëllimet e mia të sinqerta për familjet dhe të afërmit e viktimave", deklaroi Kondratyev në platformën sociale Max, sipas agjencive ruse të lajmeve.

Nga ana tjetër, Ukraina nuk ka bërë asnjë koment lidhur me incidentin apo akuzat e autoriteteve ruse.

Sulme edhe në Ukrainë

Tre të vdekur janë raportuar gjithashtu në Ukrainë në orët e fundit për shkak të një sulmi nga forcat ruse në komunitetin Shyrokivska, në rajonin e Dnipropetrovsk. Lajmin e bëri të ditur kreu i administratës ushtarake rajonale, Oleksandr Ganzha. /Piranjat News/