Kancelari gjerman Friedrich Merz ka deklaruar se presidenti i ardhshëm i Gjermanisë duhet të jetë një grua.
“Do t’i propozo...
BOTA
"Cristiano Ronaldo më mori me videocall"/ Një grua bie viktimë e mashtrimit online
PiranjatPërditësimi i fundit 2 September 2026, 19:19
Një mashtrim i pazakontë në internet ka ndodhur në Patra të Greqisë, ku një grua është bindur se po komunikonte drejtpërdrejt me Cristiano Ronaldon. Madje, ajo pretendon se e ka parë yllin portugez gjatë një video-telefonate, pa kuptuar se përballë kishte një manipulim të realizuar me ndihmën e Inteligjencës Artificiale.
Mashtruesit përdorën emrin, imazhin dhe zërin e futbollistit të famshëm për ta bindur gruan se Ronaldo dëshironte ta ndihmonte financiarisht.
Sipas dëshmisë së saj, personi që e kontaktoi i tha se mund të përfitonte ndihmë financiare, por fillimisht duhej të kryente dy pagesa nga 50 euro përmes sistemit IRIS. Asaj iu premtua se shuma do t'i kthehej shumëfish.
“Ai më tha se vetë Cristiano Ronaldo mund të më ofronte ndihmë, por, për të legalizuar këtë veprim të tij, do të më duhej të paguaja dy herë nga 50 euro”, tregoi gruaja.
Ajo që i largoi dyshimet e viktimës ishte pikërisht video-telefonata. Gruaja thotë se në ekran pa atë që dukej si Cristiano Ronaldo, brenda një makine luksoze të bardhë, ndërsa edhe zëri dukej si ai i futbollistit.
“Për t'u siguruar që nuk ishte mashtrues, më telefonoi me video dhe e pashë. Ishte Ronaldo, në një makinë luksoze të bardhë dhe po më thoshte se ndihmonte njerëzit në nevojë në të gjithë botën”, rrëfeu ajo.
E bindur se komunikimi ishte i vërtetë, gruaja kreu pagesat e kërkuara. Vetëm më vonë kuptoi se kishte rënë në kurthin e mashtruesve.
“Isha e bindur, pagova paratë, por në fund doli se isha viktimë e mashtrimit”, tha ajo.
Rasti nxjerr në pah një metodë gjithnjë e më shqetësuese të mashtrimeve online, ku përdoren mjete të Inteligjencës Artificiale për të imituar persona të famshëm. Përmes teknologjisë “deepfake”, mund të manipulohen pamjet, zëri dhe lëvizjet e buzëve, duke krijuar video që për një përdorues të zakonshëm mund të duken reale.
Mashtruesit mund të përdorin materiale autentike nga intervistat, videot apo daljet publike të personazheve të njohur dhe t'i përpunojnë ato për të krijuar komunikime të rreme. Më pas viktimave u kërkohen para ose të dhëna personale, shpesh nën pretekstin e ndihmës financiare, bamirësisë apo investimeve me fitime të mëdha.
Autoritetet u bëjnë thirrje qytetarëve të tregohen veçanërisht të kujdesshëm ndaj çdo kërkese për transferim parash në internet, edhe në rastet kur personi në ekran duket dhe tingëllon si dikush i njohur./PiranjatNews/
