Sali Berisha, gjatë fjalës së tij në një konferencë për mediat, ka bërë me dije të shtunën me 31 t...
BOTA
Dëmi i fëmijëve nga rrjetet sociale: Mark Zuckerberg përballet me gjyq pas padisë së 20-vjeçares
PiranjatPërditësimi i fundit 18 February 2026, 23:07
Drejtori ekzekutiv i Meta, Mark Zuckerberg, pritet të dëshmojë të mërkurën në një gjyq për mediat sociale në Kaliforni, i cili vë në pikëpyetje nëse veçoritë në platformat e kompanisë së tij dëmtojnë fëmijët apo nxisin varësinë.
Zuckerberg do të paraqitet para një jurie dhe para prindërve të fëmijëve që kanë humbur jetën, të cilët e konsiderojnë se përdorimi i mediave sociale ka ndikuar në tragjedinë e tyre. Ai ka kërkuar falje familjeve në një seancë dëgjimore në Kongresin e Shteteve të Bashkuara, të cilat pretendojnë se jeta e tyre u përmbys nga përdorimi i mediave sociale.
Ai mund të përballet me pyetje lidhur me algoritmin e Instagram dhe veçoritë brenda aplikacionit, të cilat paditësit argumentojnë se janë krijuar për t’i mbajtur të varur përdoruesit e rinj. Padia është ngritur nga një 20-vjeçare e identifikuar si KGM, e cila pretendon se përdorimi i platformave të Meta dhe Google gjatë fëmijërisë e nxiti drejt varësisë ndaj teknologjisë dhe përkeqësoi mendimet depresive dhe vetëvrasëse. Rasti vjen ndërsa vendet evropiane po shqyrtojnë kufizime të moshës për platformat e mëdha të mediave sociale si Meta dhe Google, për të mbrojtur fëmijët nga përmbajtja e dëmshme në internet.
Padia argumenton se kompanitë kanë bërë zgjedhje të qëllimshme dizajni, të ngjashme me teknikat e përdorura në kazino, për t’i bërë platformat më problematike për fëmijët, me qëllim rritjen e fitimeve.
Ky rast njihet në Shtetet e Bashkuara si një “gjyq vendimtar”, pasi mund të ndikojë në mënyrën se si do të trajtohen paditë ndaj gjigantëve të teknologjisë në të ardhmen dhe të sjellë rregullore të reja për mbrojtjen e fëmijëve në internet, si në SHBA ashtu edhe në Evropë.
