Studentët kanë marshuar sot në rrugët e Tiranës, ndërsa janë ndalur te Fakulteti i Ekonomikut, ku iu kanë bërë...
BOTA
“Do të ketë mbetur pak nga Irani”/ Trump kërcënon Teheranin me sulme më të forta nëse hakmerret ndaj SHBA-së
PiranjatPërditësimi i fundit 2 September 2026, 07:55
Presidenti amerikan Donald Trump ka paralajmëruar Iranin se do të përballet me sulme edhe më të fuqishme nëse Teherani tenton të hakmerret ndaj operacioneve ushtarake të SHBA-së.
Trump tha se forcat amerikane po godasin objektiva iraniane pranë Ngushticës së Hormuzit, ndërsa përjashtoi mundësinë e një marrëveshjeje të re me Teheranin.
Në një postim në platformën Truth Social, Trump bëri të ditur se sulmet amerikane janë duke u zhvilluar pranë Ngushticës së Hormuzit.
Sipas tij, operacioni vjen pas përpjekjeve të Iranit për të vendosur mina në këtë zonë dhe pas lëshimit të tetë raketave drejt një baze amerikane në Jordani.
“Sulmet janë të përhapura dhe të fuqishme”, shkroi Trump, duke bërë të ditur se raketat iraniane ishin rrëzuar.
Presidenti amerikan paralajmëroi Teheranin se çdo kundërpërgjigje ndaj sulmeve amerikane do të sillte një reagim edhe më të fortë.
“Nëse kombi i dështuar i Iranit hakmerret për këtë sulm plotësisht të justifikuar, ai do të goditet përsëri shumë më fort dhe në një nivel më të lartë”, shkroi Trump.
Në një intervistë për FOX News, ai shkoi më tej duke thënë se Irani mund të shkatërrohet plotësisht nëse konflikti vazhdon.
Trump tha se sulmet ajrore amerikane gjatë pasdites kishin në shënjestër sisteme radari në jugperëndim të Iranit, pranë Ngushticës së Hormuzit.
Sipas tij, këto sisteme po rindërtoheshin.
Në mesazhin e tij, presidenti amerikan përmendi edhe aeroplanmbajtësen USS George Washington, duke thënë se ajo është e pajisur për të vijuar operacionet ushtarake nëse do të jetë e nevojshme.
Trump përjashtoi ndërkohë një marrëveshje të re me Iranin, duke argumentuar se përpjekjet e mëparshme diplomatike nuk kanë dhënë rezultat.
Në fund të postimit, ai e përshkroi operacionin si ende në zhvillim dhe paralajmëroi se pas përfundimit të tij “do të ketë mbetur pak nga Republika Islamike e Iranit”.
