Microsoft po ofron një plan të ri për largim vullnetar nga puna për rreth 60,000 punonjës në Shtetet e Bashkuara, Kanada, Indi dh...
BOTA
“Doni të blini dyshekë?”/ 50 mijë euro shpërblim për thirrjet bezdisëse
PiranjatPërditësimi i fundit 17 February 2026, 19:20
Doni të blini dyshekë? Kjo është një frazë shumë e njohur edhe për qytetarët shqiptarë.
Të shpeshta janë telefonatat në celularët e secilit prej nesh, ku operatorë të ndryshëm tentojnë të na shesin produkte të ndryshime.
Po një kompanie një gjë e tillë i ka kushtuar shtrenjtë.
Gjykata e Apelit e Pireut, ka dhënë një verdikt me ndikim të fortë në tregun e promocioneve telefonike në Greqi, duke urdhëruar pagesën e 50 mijë eurove si dëmshpërblim për dëm moral në një rast thirrjesh të paligjshme reklamuese. Gjykata theksoi se kur një qytetar shpreh qartë refuzimin për marketing të drejtpërdrejtë, ky refuzim është detyrues dhe shkelja e tij ka pasoja të rënda financiare.
Çështja lidhej me një agjent sigurimesh, i cili më 22 shkurt 2023 kishte regjistruar numrin e tij celular në “Regjistrin 11”, parashikuar nga neni 11 i Ligjit 3471/2006, duke ndaluar shprehimisht përdorimin e të dhënave të tij për marketing të drejtpërdrejtë.
Megjithatë, nga 10 marsi deri më 26 qershor 2023, ai mori telefonata të vazhdueshme me qëllim promovimin e shërbimeve të energjisë elektrike. Sipas dosjes gjyqësore, telefonatat kryheshin nga një kompani që kishte kontratë për komunikime dalëse në emër të një subjekti tjetër, në kuadër të një fushate të organizuar marketingu për informimin e klientëve potencialë dhe caktimin e takimeve.
Paditësi argumentoi se, pavarësisht refuzimit të tij të qartë, telefonatat i kishin marrë kohë të çmuar personale dhe profesionale, duke cenuar personalitetin e tij, veçanërisht të drejtën për privatësi dhe vetëvendosje informative.
Me vendimin përfundimtar, Gjykata e Apelit konfirmoi përgjegjësinë dhe vendosi një dëmshpërblim total prej 50 mijë eurosh – ekuivalent me 10 mijë euro për çdo shkelje të konstatuar – duke dërguar një sinjal të fortë ndaj praktikave abuzive të marketingut telefonik. /PiranjatNews/
