“Duhet ta bëjmë këtë hap”, Trump nuk heq dorë nga Groenlanda: Mund të bëhet shteti i 51-të i SHBA-së

Presidenti amerikan Donald Trump ka rikthyer në vëmendje idenë e marrjes nën kontroll të Groenlandës, duke lënë të kuptohet përmes një serie postimesh në rrjetin e tij social Truth Social dhe deklaratave publike se territori mund të bëhet pjesë e Shteteve të Bashkuara.

Gjatë një interviste për Real America’s Voice, Trump u pyet nëse vijon të jetë i interesuar për Groenlandën.

“A po e shikoni ende Groenlandën? Kam parashikuar se para se të largoheni nga detyra, ajo do të jetë nën kontrollin operativ të Shteteve të Bashkuara”, e pyeti moderatori Steve Gruber.

“Po, mendoj se keni të drejtë. Groenlanda është shumë e rëndësishme nga këndvështrimi ynë. Duhet ta bëjmë këtë hap”, u përgjigj Trump.

Në postimin e tij Trump shkruan: Groenlanda mund të bëhet shteti i 51-të i SHBA-së.

Trump ka shprehur prej kohësh dëshirën që SHBA të marrë kontrollin e Groenlandës, territor gjysmë-autonom i Danimarkës, duke argumentuar se ai ka rëndësi strategjike për mbrojtjen e Shteteve të Bashkuara.

Edhe pse më herët kishte deklaruar se nuk përjashtonte përdorimin e forcës për ta marrë nën kontroll territorin, më pas ai sqaroi se nuk kishte ndërmend të përdorte forcën ushtarake.

Presidenti amerikan e riktheu çështjen edhe gjatë samitit të NATO-s muajin e kaluar, kur deklaroi se Groenlanda “duhet të jetë nën kontrollin e Shteteve të Bashkuara, jo të Danimarkës”.