E trishtë/ Hynë në operacionin 15-orësh, fund tragjik për binjaket e ngjitura

Binjaket e bashkuara në kokë, Heloisa dhe Helena, kanë humbur jetën tragjikisht në moshën dy vjeç e shtatë muaj, pas një operacioni kompleks 15-orësh për ndarjen e tyre.

Vajzat nga Brazili kishin kaluar më herët nëpër katër ndërhyrje kirurgjikale, në përgatitje për operacionin përfundimtar. Në ndërhyrjen e fundit morën pjesë më shumë se 50 profesionistë mjekësorë dhe staf mbështetës.

Operacioni u krye në Hospital das Clínicas në Ribeirao Preto. Mjekët thanë se gjatë ndërhyrjes binjaket pësuan paqëndrueshmëri hemodinamike, me ndryshime të rrezikshme të presionit të gjakut, raporton Mirror.

Edhe pse mjekët arritën t’i ndanin plotësisht, gjendja e tyre u përkeqësua pas operacionit.

Helena pësoi arrest kardiorespirator në orën 23:12 dhe, pas 25 minutash reanimimi, u shpall e vdekur në 23:37. Ndërsa ekipi ende po përpiqej ta rikthente atë, Heloisa pësoi arrest kardiak në 23:26. Edhe ajo u reanimua për 25 minuta, por u shpall e vdekur në 23:51.

Kirurgu plastik Jayme Farina Junior, një nga mjekët që koordinoi ekipin, tha se trupat e vajzave ishin veçanërisht të brishtë.