Erdogan jep mesazhin për Sirinë dhe Izraelin: Ka nisur epoka e një Turqie të madhe dhe të fuqishme

Presidenti turk Rexhep Tajip Erdogan e cilësoi periudhën aktuale si fillimin e një epoke të re për Turqinë, duke e lidhur këtë vizion me zhvillimet në Siri, Irak dhe Lindjen e Mesme.

Gjatë një fjalimi në provincën juglindore të Bitlisit, ku mori pjesë në aktivitetet për 955-vjetorin e Betejës së Manzikertit, Erdogan foli para ushtarëve të veshur me uniforma selxhukësh dhe paraqiti vizionin e tij për një Turqi më të fuqishme.

Sipas tij, Siria, Iraku dhe rajoni më i gjerë mund të hyjnë në një periudhë paqeje dhe stabiliteti pas viteve të konfliktit.

“Siria dhe Iraku, si dhe rajoni ynë më i gjerë, do të fitojnë klimën e paqes dhe stabilitetit që kanë kërkuar prej vitesh”, u shpreh Erdogan, duke përmendur gjithashtu bashkëpunimin mes turqve, kurdëve dhe arabëve.

Por fjalimi i tij pati edhe një pjesë të fortë politike. Erdogan iu kundërvu atyre që, sipas tij, po përpiqen të pengojnë rrugën e Turqisë dhe bashkëpunimin në rajon.

“Ne e dimë se kush shqetësohet nga kjo. Ne e dimë se kush është i shqetësuar. Atyre u them: pavarësisht se çfarë bëni, nuk mund të na largoni nga rruga jonë”, tha presidenti turk.

Në fjalimin e tij, Erdogan foli edhe për planet që, sipas tij, po zhvillohen në rajon dhe për përpjekjet që mund të dëmtojnë Turqinë dhe stabilitetin e Lindjes së Mesme.

Ai përdori tone të ashpra ndaj atyre që i përshkroi si “tregtarë të gjakut”, persona që përfitojnë nga terrorizmi dhe aktorë që kërkojnë ta mbajnë rajonin në pasiguri.

Edhe pse nuk e përmendi drejtpërdrejt Izraelin në këtë pjesë të fjalimit, kritikat e tij vijnë në një periudhë tensionesh të forta mes Ankarasë dhe Tel Avivit për zhvillimet në Lindjen e Mesme dhe veçanërisht për situatën në Siri dhe Gaza.

Në fund, Erdogan u rikthye te vizioni i tij për Turqinë, duke e lidhur atë me atë që e quan “Shekulli i Turqisë”.

“Fituesi do të jetë populli turk, me 86 milionë qytetarët e tij. Epoka e një Turqie të madhe dhe të fuqishme ka filluar. Shekulli i Turqisë ka filluar”, tha ai.