Boksieri shqiptar, Kristian Prenga, u mposht me nokaut në raundin e dytë nga Antoni Xhoshua, në sfidën që u mbajt në Xhedah t&eu...
BOTA
Europa në luftë me flakët! 300 mijë të evakuuar në Francë dhe Spanjë, konfirmohet viktima e parë në Valencia
PiranjatPërditësimi i fundit 26 Korrik 2026, 10:50
Zjarrfikësit po përballen me vështirësi të mëdha për të vënë nën kontroll zjarret masive në jugperëndim të Francës, ndërsa erërat e forta po shtyjnë flakët drejt qytetit të Bordosë. Një zyrtar deklaroi se autoritetet janë "ende shumë larg vënies së zjarrit nën kontroll".
Më shumë se 300 mijë persona në Francë dhe Spanjë janë detyruar të largohen nga shtëpitë e tyre për shkak të zjarreve që prej ditësh kanë përfshirë zona të gjera, ndërsa temperaturat e larta dhe erërat e forta po pengojnë operacionet për shuarjen e flakëve.
Në Spanjë, ku është shpallur gjendja e jashtëzakonshme, përmirësimi i motit ka ndihmuar zjarrfikësit që po luftojnë me flakët pranë Madridit. Kryeministri spanjoll Pedro Sánchez pranoi se vendi po përballet me "ditë të vështira".
Ndërkohë, autoritetet në Valencia konfirmuan vdekjen e një burri në një prej zjarreve. Burri, që besohet të ketë qenë rreth të 70-ave, u gjet i pajetë brenda makinës së tij nga zjarrfikësit, ndërsa ata po shuanin flakët në grykën Salt de l'Aigua në Manises, sipas mediave lokale.
Në Francë, mbrëmjen e së shtunës u urdhërua evakuimi i 55 mijë personave të tjerë, duke e çuar numrin total të të evakuuarve në rreth 250 mijë banorë në rajonet jugperëndimore të Gironde dhe Landes.
Franca ka mobilizuar edhe ushtrinë për të ndihmuar në përballimin e situatës. Forca shtesë ushtarake janë angazhuar për pastrimin e shkurreve dhe krijimin e korridoreve mbrojtëse për të ndalur përhapjen e flakëve. Presidenti francez Emmanuel Macron deklaroi se Franca "do të rindërtohet" dhe se qeveria "do të jetë pranë qytetarëve për aq kohë sa të jetë e nevojshme".
Etapa e fundit e Tour de France, e planifikuar të zhvillohej të dielën, është shkurtuar nga 133 kilometra në 89 kilometra, në mënyrë që forcat e sigurisë të ridislokohen në zonat e prekura nga zjarret, njoftuan organizatorët dhe policia.
Presidenti Macron pritet të zhvillojë një mbledhje urgjente me ministrat, ndërsa në të gjithë Francën janë aktive rreth 30 vatra të mëdha zjarri, një situatë që qeveria e ka cilësuar si krejtësisht të paprecedentë.
Edhe në Spanjë zjarret vijojnë të përhapen pranë Madridit. Që nga shpërthimi i zjarreve në Spanjë, afro 60 mijë persona janë evakuuar nga rajonet e Madridit dhe Ávilës, ndërsa më shumë se 28 mijë banorë vazhdojnë të jenë të izoluar në shtëpitë e tyre, sipas Ministrisë së Brendshme spanjolle.
Mbrëmjen e së shtunës, të paktën tetë bashki pranë Toledos morën urdhër evakuimi, megjithëse autoritetet nuk bënë të ditur sa persona u prekën. Presidentja e Rajonit të Madridit, Isabel Díaz Ayuso, e përshkroi situatën si "zjarri më i rëndë në historinë e rajonit".
Kryeministri Sánchez deklaroi se deri tani gjatë këtij viti janë djegur 130 mijë hektarë tokë në Spanjë, ndërkohë që mesatarja vjetore e dekadës së fundit ka qenë rreth 100 mijë hektarë. Ministri i Brendshëm francez Laurent Nuñez bëri të ditur se në Francë janë djegur 98 mijë hektarë që nga fillimi i vitit 2026.
Edhe Italia po përballet me një situatë të rëndë. Në ishullin e Siçilisë shpërthyen më shumë se 350 zjarre, përfshirë 10 vatra të mëdha, duke detyruar autoritetet të urdhërojnë evakuime. Një situatë emergjente u shpall edhe në Skoci të premten në mbrëmje, ndërsa shërbimet e emergjencës vijojnë luftën me një zjarr të madh në Parkun Kombëtar Cairngorms, i cili digjet prej 10 ditësh.
Komisionerja e Bashkimit Evropian për Menaxhimin e Krizave, Hadja Lahbib, paralajmëroi se dëmet nga zjarret në Evropë ka shumë gjasa të tejkalojnë të gjitha rekordet e mëparshme. Ajo tha se zjarret kanë nisur shumë më herët këtë vit dhe kujtoi se që në prill Holanda aktivizoi mekanizmin evropian të mbrojtjes civile, i cili mundëson dërgimin e ndihmës dhe përforcimeve nga vendet e tjera.
"Deri verën e kaluar u dogjën rreth 1 milion hektarë, ndërsa këtë vit presim, fatkeqësisht, një tjetër rekord historik negativ, pasi sezoni i zjarreve ka nisur shumë më herët," deklaroi Lahbib për BBC.
Ajo paralajmëroi gjithashtu se gjatë javëve në vijim priten shpërthime të tjera zjarresh.
"Meteorologët parashikojnë një tjetër valë të nxehti, ndaj duhet të presim edhe zjarre të tjera," shtoi ajo.
Franca ka aktivizuar mekanizmin evropian të mbrojtjes civile dhe do të marrë ndihmë ndërkombëtare, përfshirë tre avionë Canadair nga Kroacia, dy avionë Air Tractor nga Portugalia, helikopterë Black Hawk nga Çekia dhe Sllovakia, si edhe 40 pjesëtarë të ekipit rumun për shuarjen e zjarreve në pyje.
Presidentja e Komisionit Evropian, Ursula von der Leyen, bëri të ditur se Bashkimi Evropian ka dërguar gjithashtu 11 avionë dhe helikopterë nga flota evropiane e zjarrfikjes për të ndihmuar Francën dhe Spanjën.
