FBI bastis shtëpinë e Eric Swalwell, i sekuestrohen edhe pajisjet elektronike

Agjentët federalë i sekuestruan pajisje elektronike ish-përfaqësuesit demokrat Eric Swalwell në aeroportin e San Franciskos të shtunën dhe një ditë më pas kontrolluan banesën e tij në Uashington, DC, raportoi CNN, duke cituar burime të njohura me hetimin.

Sipas burimeve, veprimet e autoriteteve janë pjesë e një hetimi federal në vazhdim, të lidhur me pretendime për sulm seksual ndaj ish-kongresmenit.

Swalwell dhe avokati i tij nuk iu përgjigjën menjëherë kërkesave të CNN për koment.

Swalwell dha dorëheqjen nga Kongresi në prill, pasi CNN dhe San Francisco Chronicle publikuan raportime mbi akuza për sjellje të pahijshme seksuale ndaj tij.

Pas publikimit të akuzave, Zyra e Prokurorit të Distriktit të Manhattanit dhe Departamenti i Sherifit të Los Anxhelosit hapën hetime penale. Sipas CNN, kontrollet e kryera gjatë fundjavës lidhen me një hetim federal mbi pretendimet për sulm seksual.

Tre gra që kanë folur publikisht dhe kanë ngritur akuza për sjellje të pahijshme seksuale ndaj Swalwell i thanë CNN se kanë komunikuar edhe me FBI-në.

Deri tani, autoritetet nuk kanë njoftuar ngritjen e akuzave penale ndaj Swalwell. Pretendimet ndaj tij mbeten akuza nën hetim.